Suliffiutitaarniarlutik aallartitsiniat illuuteqalissapput

Illu suliffinnik pilersitsivik Nuummi aggustip ulluisa aallaqaataanni ammarneqassaaq.
januaarip 27-at 2010 05:33

Namminersortutut suliffiutitaarniarnermut oqitsumik ikaarsaariartoqarnissaannut illu taamaalilluni periarfissiissaaq.

Suliffiutitaarniarlutik aallartitsiniat ininik attartorneqarsinnaasunik attartornissaminnut akissaqartannginnertik pissutigalugu suliffiutitaarniarnerminnik unitsitsiinnartarput. Ininillumi attartorneq akisuvoq. Illu suliffinnik pilersitsivik pingasunik allaffeqassaaq, attartornissaallu kommunip attartorluni akilutaasartup pingajorarterutaannaa akilertassavaat. Suliffinnilli aallartitsiniat innaallagissamut, imermut kiassarnermullu tamatuma saniatigut akiliisassapput.

Illu suliffinnik pilersitsivik arfineq-marlunnik initaqassaaq, taakkunannga sisamat sullivittut atorneqassallutik. Illu sulliviup ingerlanneqarnissaanut Kommuneqarfik Sermersooq 477.000 koruuninik ukioq manna immikkoortitsivoq.