Suliffitsialammik toqqaasinnaavit?

Kalaallit Nunaanni suliffigissaaneq pillugu siunnersuisoqatigiit ukiormanna sullivinni avatangiisigissaarnerpaamik akissarsisitassaminnik ujaasilerput. Sullivinni avatangiisigissaarnerpaatut siorna nersornaatisisoq tassaavoq suliffeqarfik ingeniørit siunnersuisartut "Inuplan A/S", tassa nersornaasiinermi qulequtaritinneqartut arfinillit naammassisimagamikkit.
Allattoq Elisa Isaksen
januaarip 08-at 2013 06:42

Sulianut piumasaqaatit, tassa sullivimmi sulisunut piffissamik piumasaqaatit, misigissutsikkut aamma inooqataanikkut piumasaqaatit. Suliamut sunniuteqaqataaneq, matumani eqqarsaatigalugit sulisut suliap aaqqissuunneranut, ingerlanneqarneranut aamma kikkunnik suleqateqarnissamik sunneeqataasarnerat. Suliap isumaqassusia. Nammineq suliarisap sulliviullu suliaata qanoq siunertaqarnerat. Tapersersoqatigiinneq, tassa aqutsisunit suleqatinillu tapersersorneqarneq, ikiorneqarneq utertitsiffigineqartarnerlu. Siumut naatsorsuuteqarneq, tassa sulisut akornanni suliassanut nalornissuteqarneq  nalornisoornerlu. Kingullertullu suliamik nersorneqarneq, tassa akissarsiatigut, sullivimmi qaffakkiartornikkut, akuerineqarnikkut aamma nersorneqarnikkut akissarsitinneqarneq.

Suliffeqarfiit pitsaasut akissarsitinneqartarnissaat, Suliffigissaaneq pillugu siunnersuisoqatigiit siunertaraat. Siunnersuisoqatigiit tusagassiuutinut nalunaarumminni allapput, ilisimagitsik sullivinni amerlasuuni, pisortat namminersortullu suliffeqarfiini nutarterinerit pitsanngorsaanerillu ingerlanneqartut, suliassanik annertusaanernik sulisunillu taarsersuinerujussuarnik kinguneqartartut. Tamakku kingunerinik sulisut ataasiakkaat ernumalersarput, tamakkulu assut napparsimakulanerunermik kinguneqartarlutik.

- Suliffeqarfiit taamaalillutik nigalittut utikattumik ajornartorsiuteqalersarput, nukinnik tamanut atuilussinnartitsilersunik.

2013-imi sullivinni avatangiisigissaarnerpaamik siunnersuuteqarnissamut killiliunneqartoq tassaavoq ukiormanna septemabrip 30-at.