Inuussutissarsiutit Ilinniarneq

VIDEO Suliffissuup suliffissaqartitsineratigut Narsamit noorarneq unitsinneqarsinnaasoq

Narsami innuttaasut 1500-iusut akornanni 204-t suliffissarsiortuupput. Aalisakkanik tunisoqarpiassaarmat Royal Greenland ikittuinnarnik sulisoqarpoq. Tamanna iliuuseqarfigineqartariaqartoq SIK-mit oqaatigineqarpoq.

Allattoq Jørgen Semionsen, Camilla Dam

februaarip 24-at 2015 12:18

- Sikusarnera tunisiniarnermut ajornakusoortitsisarpoq Helga Egede Gotfredsen, Narsami SIP-mi siulittaasoq nassuiaavoq.

Naalakkersuisulli Kommune Kujallerlugu suliffissaaleqinerup akiorniarneqarnissaanut pilersaarusioreersimapput. Suliffissuaq kilisaatinit avataasiortunit pilersorneqarsinnaappat, tamanna suliffissanik amerlanerusunik pilersitsisinnaassaaq.

- Avataasiortut saarullinnik aalisakkanillu allanik tunisisalersinnaanissaat neriuutigaarput, taamaaliornikkut suliffissaqartitsiniarneq siumut-saatsinneqarsinnaassammat, Helga Egede Gotfredsen KNR-imut taama oqarpoq.

Aamma atuaruk Naalakkersuisut Narsami suliffissaaleqisut immikkut ittumik suliniuteqarfigileraat

Naalakkersuisulli iliuusissatut pilersaarutaat apeqqutaassaaq.

- Aalisakkanik tunitsiveqarneq aqqutigalugu annerusumik suliffissaqartitsisoqarsinnaanngippat innuttaasut amerlanersut Narsamit nuunnissaat naatsorsuutigisariaqarpoq, SIP-mi siulittaasoq oqarpoq.

Aningaasanut inatsisissatut siunnersuummi tallimanngormat saqqummiunneqartumi ilaatigut Narsaq immikkut Naalakkersuisut suliniuteqarfiginiarpaat.

Aamma atuaruk Narsami atuarfik nutarterneqareerluni 2016-imi naammassineqassaaq

Narsap Atuarfiata oqoqarnerata saniatigut radoneqarpallaarnera 2013-imi paasineqarmat atuartut utaqqiisaagallartumik allami atuartinneqartarput. Atuarfiulli nutarterneqarnissaa nutaamillu sanaartornissaq aningaasanut inatsimmut ilanngunneqarpoq.

Aamma atuaruk Narsap Atuarfia atoqqinneqassanngilaq