Suliffissuassaq ukioq naatinnagu ammassagunarpoq

Royal Greenland aalisakkanik Polenimi ukiup naalernerani pujooraluni aallartissasoq, Polenimi aviisi Warsaw Business Journalimi allaaserineqarpoq.

- Aalisakkanik tunisassiorfiusinnaasoq isumaqatigiinniutigileruttorparput, Royal Greenlandip pisortaa Henrik Leth oqarpoq.

Polenimi aalisakkanik tunisassiorfiutillit siulittaasuat Jerzy Safader Royal Greenlandimik tikilluaqqusivoq.

- Unammillernermut iluaqutaassaaq, suliffissuillu sukkanerusumik sulinissaannik kinguneqassalluni. Tamanna Polenimi atuisunut iluaqutaassaaq, Jerzy Safader oqarpoq.

Polenimi inuussutissarsiornermut aviisimi aamma allaaserineqarpoq, illoqarfik Koszalin Royal Greenlandip aalisakkeriveqarfittut piukkukkaa, atortunullu nutaanut 10-15 million koruuninik aningaasartuuteqartoqassamaartoq. Tamannali Royal Grenlandimit suli uppernarsineqanngilaq.

Royal Greenlandip Gløngøremi suliffissuani sulisut 100-t soraarseriarlugit Polenimi suliffissuartaalernera juunimi nalunaarutigineqaqqaarpoq. Danmarkimi sulisut suliffissuarnut unammillertunut naleqqiullugit arfinileriaammik akissarsiaqarnerunerat Polenimut nuussinissamut tunngavigineqarpoq.