Suliffissuaqarnikkut ineriartortitsisinnaanngorpugut
Uuliasiornerit, Alcoap suliffissuaqalernera, assingusunillu suliffissuaqarnikkut piorsaanissat ukiuni tulliuttuni 30-ni pisinnaanngorput, naalakkersuisut siulittaasuat Kuupik Kleist iluarisimaarinnippasilluni KNR-imut oqarpoq.
Tassa silap pissusaa pillugu isumaqatigiissutissap nutaap nunatta suliffissuaqarnikkut piorsarnissaa ajoqusersinnaajunnaarpaa, tamannami ualeq manna Kuupik Kleistip Connie Hedegaardillu oqarasuaatikkut isumaqatigiissutigaat. Ataatsimiinneq siuartinneqarsimarpasippoq aqagu folketingimi nunatta qanoq isumaqatigiissuteqarsimanera pillugu oqallinnissaq pitinnagu.
Tassa nunat tamalaat akornganni isumaqatigiissummi nunarput peqataatinneqassaaq, avatangiisinut tunngasut eriagineqassapput, aammali aningaasarsiornikkut suliffissuartigullu inerisaanissaq qulakkeerneqassalluni. Tamannalu tassa COP15 pitinnagu noqqaassutigiuarsimavarput, Kuupik Kleist oqarpoq.
- Nunarsuatsinni ineriartortitsinermi pissutsinit atuuttunit ajornerusumik inissinneqassanngilagut, aningaasarsiornissarpullu akorngusersorneqassanngilaq, tamannalu ullumikkut anguarput, Kuupik Kleist KNR-imut oqarpoq.
