Suliffissuaqarnerup piniartut ilinniarsimanngitsullu inissaqartinngilai
Nunatsinni suliffissuaqarnikkut ingerlatsilernermi piniartut ilinniagaqanngitsullu periarfissinneqanngikkunik eqqugaassapput. Silap pissusaata allanngoriartornera pissutigalugu piniartut aningaasatigut isertittagaat amigaatigineqalissapput taakkualu illoqarfinnut anginernut sisamanut-tallimanut nuuttariaqalissapput, tassanilu suliffissaaleqinissat aarleqqutigineqarpoq.
Kalaallit nunaata namminersornermut inatsisaani allassimavoq, kalaallit politikkeriisa inuiaqatigiit tamakkiisut suliffissuaqarnermi suliaqalernissaannut allanngortinniaraat.
Aluminiuliorfissarsuarmut aammalu aatsitassarsiornermut uuliarsiornermullu aningaasalersuinerit tamakkiisumik aalluttariaqarnerat tassani piumasaqaatigineqarpoq tamannalu kalaallit politikeriisa piumasaraat berlingske tidende allappoq.
- Silap pissusaata allanngoriartornerata malitsigisaanik suliffissuaqarfinngoriartortitsineq maanna Kalaallit Nunaanni aallartereerpoq, tamannalu aallaavigalugu aningaasalersuisarnerup ilinniartitaanerullu iluani nutaamik eqqarsarnissamik piumasaqaatitaqarpoq. Taamaaliortoqanngippat inuit ikittuinnaat periarfissaq atorluarlugu silap pissusaata allanngoriartornera iluaqutigissavaat, taamak silap pissusaa pillugu ilisimatooq Frank Sejersen silap pissusaa pillugu Københavnimi ataatsimeersuarnermi ualimut oqalugiarnermini oqarpoq.
