Suliffissarsiortutut nalunaarsorneqarsimasut ikileriartut
Tassami siorna 2014-imi februaarimi suliffissarsiortutut nalunaarsorneqarsimasut katillutik 4420-upput, ukioq mannalu katillutik 4085-iullutik. Nunatsinni piffissap taamaalinerani suliffissarsiortutut nalunaarsorneqarsimasut taamaalillutik 335-nik ikileriarsimapput.
Kalaallit Nunaanni Naatsorsueqqissaartarfiup kisitsisaataasa tamanna takutippaa.
Suliffissarsiortutut ukioq manna februaarimi nalunaarsorneqarsimasut 4085-iusuni 691-it nunaqarfinneersuupput.
Nuummi, Maniitsumi, Aasianni Upernavimmilu suliffissarsiortutut ukioq manna februaarimi nalunaarsorneqarsimasut siornamut naleqqiullugu ikileriarnerpaasimasut Naatsorsueqqissaartarfiup kisitsisaataasa takutippaat, Tasiilamilu amerleriarnerpaasimallutik. Tassami tamaani suliffissarsiortutut ukioq manna februaarimi nalunaarsorneqarsimasut 287-iupput, siorna 239-iullutik.
Inuusuttut suliffissarsiortut Nunatsinni amerlanerpaapput, tassami 20-t 24-llu akornanni ukiullit suliffissarsiortut amerlanerpaammata. Angutit 50-it 54-illu akornanni ukiullit illoqarfinni najugallit suliffissarsiortut aamma amerlanerpaasut kisitsisit takutippaat.