Suliffissarsiortup neriumajunnaarnini unitsippaa

Palasitut atorfinitsinneqarusunnginnini akerliuniarfigalugu, Arne Ib Nielsen tallimanngormat januaarip aallaqqaataanili neriumajunnaarpoq. Taanna palasitut atorfinnut inuttassarsiorneqartunut arlalinnut qinnuteqartaraluarluni, atorfinitsinneqarneq ajorpoq, naak palasinik amigaateqartoqaraluartoq.

Arne Ib Nielsenip neriumajunnaarnera aallartimmat, Atassummeersup Steen Lyngep, sooq atorfinitsikkumaneqannginneranik nassuiaasoqarnissaa piumasaraa.

Ilagiinnut naalakkersuinikkut akisussaasoq, Mimi Karlsen tamatumunnga akissuteqarpoq, oqarluni Arne Ib Nielsenip qinnuteqaatai eqqortumik suliarineqartarsimasut, aamma qinnuteqartut allat assigalugit, qinnuteqaraangami akissuteqarfigineqartartoq.

Ulluni arfineq- marlunni neriumajunnaareerluni, tassa maanna Arne Ib Nielsenip akerliussutsimik takutitsinini unitsinniarlugu aalajangiukkaa, Sermitsiap nittartagaani allaaserineqarpoq.

Tamatumunnga kaannera pissutaanersoq imaluunniit suliffissaminik neriorsorneqarsimanera pissutaanersoq oqaatigineqanngilaq.