Suliffissaqaratik inissaqaratillu Aalborgimut nuuttarput

Angutit kalaallit inuusuttut, 18-t 25-llu akornanni ukiullit, suliffissaqannguaratik inissaqaratilluunniit Aalborgimut nuuttarput. Aalborgimi Kofoed Skolemi pilersaarusiortartup, Helle Rønnip, nalilerpaa, inuk ataaseq sapaatip akunneri marluk qaangiukkaangata maanna nuuttartoq. Qaammatit marluk kingulliit ingerlaneranni kalaallit tallimat nuussimapput.

- Sapaatip-akunneri marluk qaangiuttullu kalaaleq nutaaq takkuteriasaartarpoq, Helle Rønn oqarpoq.

Helle Rønn oqaluttuarpoq, angutit inuusuttut nuuttartut tamakku Kalaallit Nunaanni pinerluttuliortarnertik, imaluunniit imigassamik ikiaroornartumilluunniit, aanngajaarniutinilluunniit allanik atornerluisuunertik qimarratigalugulusooq Aalborgimut nuuttarput. Immaqaluunniit Danmarkimut ilinniagaqariartoraluarlutik ilinniarnerminnik taamaatitsiinnarsimasuusarput. Tamakku kollegiami inigisartik ilaatigut annaasarpaat, taamaalillutillu inuunerat ammuinnaq ingerlalersarpoq, ikiuutinik inuussuteqalersarput, angerlarsimaffeqaratik ilarpassuilu imigassamut nakkaativittarlutik.

- Aalborgimi kalaallit arnat angutillu ajornartorsiutillit Kofoed Skole aqqutigalugu tamakku ilarpassuisa nassaarisarpaat, Helle Rønn oqarpoq.

Atornerluisullu tassaanngillat angutinut inuusuttunut tamakkununnga avatangiisit pitsaanerpaat.

- Atornerluisunngoraangamik taamaatinneq ajulersarput, atornerluisummi qanoq iliorneri isiginnaaraangamikkik, namminnerlu atornerluisunngorlutik, taava tamakku qimannissaat ajornakusoortittaqaat, Kofoed Skolemi pilersaarusiortartoq, Helle Rønn, oqarpoq.