VIDEO Suliffissanik sungiusarfissanik amigaateqarnerup qaangernissaanut siunnersuutit

Inuiaqatigiit atugartuunngussappata oqartoqartarpoq aqqut tamatumani ataasiinnaasoq, tassalu ilinniarneq, ilinniarneq taamatullu ilinniarneq.
Allattoq Sivert Olsen
februaarip 20-at 2015 19:28

- Ullut tamarluinnangajaaviisa inuusuttunik takkuttoqartarpoq praktikkerfissarsiortunik, sanasoq namminersortoq Nikolaj Ezekiassen KNR-imut oqarpoq.

Ilinniarfissalli killeqarput sanaartorneq uninngammat.

- Inuiaqatigiit iluanni oqallittoqarpoq aningaasameertoqartoq, Nikolaj Ezekiassen oqarpoq.

Inuiaqatigiinnili aningaasameertoqaraluartoq suliffeqarfiit ilinniartuutillit suliakkerneqarnissaannut suusupagineqartarnerat sanasup namminersortup maluginiagaasa ilagaat.

- Soorlu Namminersorlutik Oqartussat, assersuutigalugu inissiaatiminnik allaffissuarminnik tamakkuninnga iluarsiiniaraanni, allaffimmi aqutsiveqarfik naluara suna najoqqutaralugu suliassanik tunioraasarnersut. Uanga nammineq suliffimmik piginnittuusutut ukiumut ataasiarluta immaqa suliassannguamik tunineqartarpugut, tassuuna takussutissaannaavoq qanoq ilinniartoqarneq pingaartinneqanngitsigisoq, sanasoq namminersortoq Nikolaj Ezekiassen KNR-imut oqarpoq.

Ilinniartunngorniarnermi suliffissanik sungiusarfissanik amigaateqarnerujussuaq pillugu Inuusuttut inatsisartuisa siunnersuutigeqqammerpaat ilinniarfinni sungiusaammik suliffissanik tamani pilersitsisoqassasoq.

- Praktikkerfissaqanngitsorpassuugamik ullumikkut atuarusukkaluarlutik, taava taakkua praktikkerfissarsiuunneqarnissaat anguniarlugu una siunnersuut siunnersuutigisimavarput, Amalie Bourup Aasianniit Inuusuttut inatsisartuinut peqataasoq KNR-imut oqarpoq.

Suliffinnili sungiusarfissaaleqineq anigorneqassappat pineqartumut attuumassutillit tamarmik suleqataasariaqarput.