Suliffissaaleqisut suli amerliartorput

Kalaallit Nunaanni Naatsorsueqqissartarfimmit kisitsisit nutaat suliffissaaleqisut amerliartuinnerat takutippaat.
Allattoq mlk, Carla Davidsen
marsip 14-at 2014 10:15

Suliffissaaleqisut 2013-imiit 2014-imut 511-nik ilasimapput, taamaalillutik Nunatsinni suliffissaaleqisut maanna 4.420-nngorlutik;  tassalu procentinik 13-inik qaffariarput.

Nunatsinni suliffissaaleqisut 2008-mili amerliartuinnavipput. Suliffissaaleqisulli illoqarfinnut naleqqiullugit nunaqarfinni amerliartornerupput.

Upernaviup nunaqarfiini ajorluinnarpoq, suliffissaaleqisummi ukiup ataatsip ingerlanerinnaani 114-inik amerleriarsimapput. Nuummi suliffissaaleqisut aamma amerliartupiloorput. Nuummi suliffissaaleqisut maanna 941-pput, siornamut naleqqiullugu 191-inik amerlanerullutik. Sumiiffinnili ataasiakkaani allanngotoqarpianngilaq. Soorlu Tasiilami, Qaanaami, Sisimiuni, Qasigiannguani Kangaatsiamilu, suliffissaaleqisut siornatut amerlatigiinnangajapput.

Sulifissaaleqisuni angutit amerlanerupput, 59 procentingajaallutik, nunaqarfiilli eqqarsaatigalugit arn at angutillu suliffissaaleqisut amerlaqatigiiginnarput.

Inuusuttulli suliffissaaleqisut aamma amerliartortut Naatsorsueqqissaartarfimmit kisitsisit aamma takutippaat. 18-iniit 29-nut ukiullit 1.622-t maanna suliffissaaleqipput. Inuilli suliffissaaleqinermik eqqugaasimasut februaarimi saaffiginnissimasut aallaavigalugit naatsorsuinerit pisimapput.