Suliffissaaleqisut Kangaatsiami amerlinerpaapput
Ukioq manna qaammatini siullerni pingasuni suliffissaaleqisut agguaqatigiissillugu 2,045-simapput, 2009-mi suliffissaaleqisut 1,590-usimallutik. Procentinngorlugu ukioq manna 7 procentiupput siorna 2009-mi 5,6 procentiinnaallutik.
Kangaatsiami suliffissaaleqineq qaffariarnerpaasimavoq, aalisakkeriviup matunerata kingorna 40 procentinngorsimalluni.
Aamma Illoqqortoormiuni suliffissaaleqisut pingasoriaatinngorsimapput, 20 procenti angungajallugu suliffissaaleqisoqalerluni, tamatumunnga pissutigitinneqarpoq Illoqqortoormiuni sanaartornerup unikkallarsimanera, taamaalilluni Illoqqortoormiuni sanasut suliffissaaleqisutut nalunaarsorsimalermata.
Upernavimmi Narsamilu suliffissaaleqisut ikileriarsimapput. Upernavimmi qaleralinnik tunisinerup aallartiaarneranik pissuteqarpoq, Narsami suliffissaaleqisut pikkorissartinneqartalernerat pissutaasimalluni, Kalaallit Nunaanni Naatsorsueqqissaartarfik taama nalunaarpoq.
Kalaallit Nunaata Naatsorsueqqissaartarfiata nittartagaani atuarneqarsinnaapput, illoqarfinni ataasiakkaani qaammatini pingasuni siullerni, suliffissaaleqisut kisitsisinngorlugit takusassiarineqarneri.