Suliffissaaleqisut ikileriarsimapput

Naatsorsueqqissaartarfimmit nunatsinni suliffissarsiortut novemberip qaammataani amerlassusii saqqummiunneqarput. Tassani takuneqarsinnaavoq suliffissarsiortutut nalunaarsukkat 3.473-isut siorna taamaalinerani 3.685-iusimasut - tassalu suliffissarsiorlutik nalunaarsukkat 212-inik ikileriarsimallutik.
Allattoq Jaaku Lyberth, Hagen Højer Christensen
decembarip 15-at 2014 16:41

Naatsorsueqqissaartarfiup kisitsisaataanni takuneqarsinnaapput illoqarfinni nunaqarfinnilu suliffissaqartitsinerit  pitsanngoriaateqarsimasut.

Suliffissaaleqisut ataatsimut isigalugit nunaqarfinni ikileriarsimapput.

Nunaqarfinni suliffissaaleqisut siorna novemberimi 713-iusut ukiormanna 569-inut ikileriarput. Illoqarfinnili suliffissaaleqisut ikileriarneri annikinnerusimapput.

Suliffissaaleqisut 68-inik ikileriarsimapput, tassalu illoqarfinni suliffissaaleqisut 2.900-nit suli amerlanerupput.

Nuummi suliffissaaleqisut amerlerialaarsimapput. Nuummi suliffissaaleqisutut nalunaarsorneqarsimasut 841-upput, Sisimiuni 272-iusut, Ilulissani Maniitsumilu allannguuteqaratik, Ilulissani suliffissaaleqisut 203-usut Maniitsumi suliffissaaleqisut 208-pput.

Qaqortumi suliffissaaleqisut ikileriarput. Siorna Qaqortumi suliffissaaleqisut nalunaarsorneqarsimasut 233-usimallutik ukiormanna novemberip qaammataani 165-it suliffissaaleqisutut nalunaarsorneqarsimapput.

Suliffissaaleqisut ukiuinut agguataarneqarneranni 18-init 29-nut ukiullit amerlanerupput. 18-init 29-nut ukiullit 1.202-t suliffissaaleqisut nalunaarsorneqarsimapput, 30-nit 44-nut ukiullit 982-it suliffissaaleqisutut nalunaarsorneqarsimallutik.

Suliffissaaleqisuni angutit amerlanerussuteqartuarsinnarput, tassalu angutit 1.975-it suliffissaaleqipput arnat 500-nik ikinnerullutik, tassalu arnat 1.494-it suliffissaaleqisutut nalunaarsorneqarsimasut, naatsorsueqqissaartarfiup kisitsisaataani takuneqarsinnaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq