Suliffissaaleqisut ikileriarput
Ukiut pingasut ingerlanerini illoqarfinni suliffissaaleqineq appariartuinnavissimavoq. Naatsorsueqqissaartarfiup ukioq manna ukiup qaammataani siullerni pingasuni naatsorsugaa siulleq taama saqqummiussivoq.
Illoqarfinni suliffissaaleqineq agguaqatigiissikkaanni inuit 1.993-t suliffeqanngillat.
Taannalu procentinngoraanni 7,2 procentiuvoq.
Illoqarfinni suliffissaaleqisut 2006-p aallartinnerani qaammatini siullerni pingasuni agguaqatigiissillugu amerlanerusimagaluarput, taamanimi suliffissaaleqisut 2.867-usimagaluarput.
Siorna ukiup taamaalineranut ullumikkut suliffissaaleqisoqarnera sanilliukkaanni, suliffissaaleqineq 339-nik ikileriaateqarpoq.
Politikerittaaq suliffissaaleqinerup annikillilerneqarnissaa iliuuseqarfiginiarpaat. Inatsisartummi upernaaq manna ataatsimiinneranni tamatuma qanoq iliuuseqarfigineqarsinnaanera pillugu naalakkersuisut siunnersuuteqarput.
Naalakkersuisut siunnersuutaanni Sulisitsisut akileeqataassuteqartalernissaat anguniarneqarpoq. Sulisitsisullu akileeqataassuteqartalernissaat pillugu Inatsisartut peqqussutiliaanni nutaajusumi anguniarneqarpoq sulineq imminut akilersinnaasariaqartoq. Tassalu isumaavoq suliffissaaleqisoqartillugu naparliinnartoqartassanngitsoq.
Tamannali anguneqassappat pilersaarusiorluartoqartariaqartassaaq. Inuit ataasiakkaat pilersaarusioqatiginerisigut sulinissamut ilaatigut sungiusarneqartassapput.
Suliffissaaleqisoqartillugulu anguniakkamik toraagaqarluni pikkorissaaneq aqqutigalugu aamma ineriartortitsisoqartalissalluni.
Ullut 14-t sinnerlugit suliffissaaleqigaanni kommuni suleqatigalugu suliffissarsisoqartassaaq, ilaatigut pikkorissartitsinerit, allanik ilinniagaqaqqinnerit aamma aqqutigineqartassallutik.
Suliffimminnit angerlarartiinnarneqartariaqartartut siunissami aningaasarsiaqartinneqarsinnaalernissaat naalakkersuisut nutaatut aamma siunniuppaat.
Inatsisissaq nutaaq tassalu; sulisitsisut akileeqataassuteqartarnissaannik inatsisissaq juulip aallaqqaataani atuutilissaaq. Inatsisissap taassuma, inatsisaareersoq, annertussusileriikkamik ikiorsiinermik inatsit, taarsissavaa.
