Suliffissaaleqisut ikileriarput

Illoqarfiit ilaanni suliffissaaleqisut 2005-mimi ukiumut siulianut naleqqiullugit 172-inik ikinnerulersimapput.

2005-imi qaammatip qiteqqunnerani agguaqatigiissillugu suliffeqanngitsut 2005-imi 1.682-iupput 2004-mi 1.854-iullutik. Ukiumut siulianut sanilliullugu 172-inik ikinnerulersimapput, procentinngorlugu 6,2 procentiullutik. Taama nalunaaruteqarput Kalaallit Nunaanni Naatsorsueqqissaartarfik, ullumi tusagassiutinut nalunaaruteqarnerminni.

Tamatumunnga atatillugu naatsorsueqqissaartarfiup nalunaarutigaa, sulisinnaasut ukiumut siulianut sanilliullugu 330-nik amerleriarsimammata.

Illoqarfinni angisuuni amerlanerpaani suliffeqanngitsut ikileriarsimapput. Nuummi suliffeqanngitsut 60-inik ikileriarsimapput, tassa 432-niit 372-inut ikileriarsimallutik. Maniitsumi 39-nik ikileriarsimapput, 188-iniit 149-nut. Qaqortumi 162-init 132-nut ikileriarsimapput, tassa 30-nik ikileriarsimallutik. Ilulissani suliffeqanngitsut ikinnerpaajujuarsinnarput 108-t suliffeqannginnamik, procentinngorlugu 4,0 procentiullutik.

Illoqarfinni ataasiakkaani suliffeqanngitsut amerleriarsimapput. Aasianni suliffeqanngitsut 20-nik amerleriarsimapput, 141-niit 161-inut amerleriarsimallutik. Tasiilami 16-inik amerlisimapput, 65-init 81-inut amerlisimallutik. Nanortalimmi suliffeqanngitsut qulingiluanik amerlisimapput 88-init 97-inut amerlisimallutik. Illoqqortoormiuni suliffeqanngitsut nunarput tamaat isigalugu amerlanerpaajujuarsinnarput 46-gamik, procentinngorlugu 15,0 procentiullutik.

Angutit arnanit amerlanerullutik suliffeqanngitsuupput. Angutit 752-it suliffeqanngitsuugamik, arnallu 617-iullutik.

Inuusuttut 20-niit 24-nut ukiullit suliffeqanngitsut procentiat qaffasinnerpaavoq, tassa 7,9 procentiugami.

Suliffissaaleqisut 81 procentii ilinniagaqarsimanngitsuupput, suliffissaaleqisuni 1.682-iusuni 1.371-it ilinniagaqarsimanngitsuugamik.

Ilinniarsimasut akornanni allamiut suliffissaaleqisut amerlanersaapput.