Suliffissaaleqisut atugaat inatsisartuni oqaluuserineqassaaq
Ullut marluk qaangiupput suliffissaaleqisut naatsorsorneqarnerisa allattorsimaffii saqqumiunneriniit, ullumilu Inatsisartut tamannarpiaq sammissavaat.
Illoqarfinni suliffissaarusimasut ikiliartoraluartut, suliffissaaleqisut 6,2 %t atugarissaarnerunissaat qulakkeerniarneqassaaq.
Annertussusileriikkamik ikiorsiisarnerup iluarsiiviginissaa Inatsisartut siullermeerlugu oqallisigissavaat. Suliffissaaleqisut namminneq pisuussutiginngisaminnik suliffissaaleqinerini, napparsimalernerinilu pitsaanerusumik atugassaqartitaalernissaat isummersorfigineqassaaq.
Annertussusileriikkamillu ikiorsiisarnermi ilaatinneqanngitsut, suliassaaleqineq pillugu angerlartiinnarneqartartuttaaq ilanngullugit iluarsiiviginiarneqarput.
Suliassaqanngitsillugulu pikkorissartarnissat qulakkeerniarneqarput.
Naalakkersuisut siunnersuutaat Inatsisartut akuersissutigissappassuk inatsit juulip aallaqqaataani ukioq manna atuutilissaaq.