Suliffissaaleqisut angerlaqqikkusupput
Aanguaq Atanaaq 2008-mi Danmarkimut nuuppoq, nunatsinnullu uteqqinnissani eqqarsaatigisarpaa, tamannali ajornaatsuinnaanngilaq.
Kalaallit illui siunnersortit nunatsinnut uteqqikkusuttunit ikioqqullutik saaffigineqartarput, nunatsinnilu inissaq suliffissarlu amigaataagaangata uteqqinnissaq ajornakusoortarpoq.
- Tassa pilersaarutigivara Kalaallit Nunaannut angerlaqqikkusullunga, apeqqutaaginnarpoq nunatsinni ineqarnermi qanoq akisutiginera, Kalaallit Nunaannut angerlaqqinniaruma pisariaqartilluinnakkattut toqqassagukku, sumi sulissaanga? Aanguaq Atanaaq 2008-mi Danmarkimut nuuttoq taama oqarpoq. Aanguup Danmarkimut nuukkamili nunatsinnut uteqqinnissani eqqarsaatigisarpaa, kisimiinngilarlu taamatut kissaateqartoq.
Aalborgimi Kalaallit illuanni siunnersortit nunatsinnut 2011-mi uteqqikkusullutik siunnersortikkusut 25-t sullippaat.
Danmarkimi suliffissaaleqineq imaluunniit inuiaqatigiinnut akuliunniarnerup ajornartorsiutaanera aamma nunatsinnut angerlarserneq, uteqqikkusulernermut patsisaasartoq, inunnik isumaginninnermut siunnersorti, Vibeke Sieborg oqarpoq.
- Siunnersortikkusullutik saaffiginnittut Danmarkimi suliffeqarsimanngillat. Isumaqarpunga Kalaallit Danmarkimi suliffittaaraangamik, taava aatsaat nunasivinnissaminnut patsisissaqarnerulaalissarput, Aalborgimi kalaallit illuanni isumaginninnermi siunnersorti Vibeke Sieborg oqarpoq. Danmarkimi kommunit nunatsinnut angerlaqqikkusuttut uternissaannut aningaasaliinissaminnut akuersisinnaasarput, tassa nunatsinni/Kalaallit Nunaanni inissaq aamma suliffissaq qulakkeerneqarsimagaangat, tamannali ajornakusoortartoq, Københavnimi kalaallit illuanni isumaginninnermi ataqatigiissaarisoq Naja Møller oqarpoq.
- Ilaatigut una inissaqarniarneq suliffissaqarniarnerlu ilinniarsimanngitsuugunik ajornakusoortorujussuusarpoq uteqqinnissaat, Naja Møller oqarpoq. Nunatsinnut uteqqikkusullutik Kalaallit illuinut saaffiginnittartut nalunaarsorneqartanngillat, amerlassusiilu erseqqissumik kisitsisaatigineqaratik.
Aannguaq Atanaaq nunatsinnut uteqqikkusunnini pillugu siunnersortinut saaffiginnissimanngilaq, nunatsinni inissaq suliffissarlu periarfissaanersut nammineq misissussamaarpai.
- Naatsorsuutigivara martsip apriilillu akornanni Nuummut immiussannik tunniussiartoruma, taava tassani periarfissaqarsinnaassuunga, ilumut nunatsinnut angerlaqqissinnaanermut, nooqqissinnaanermut, suliffissaqarsinnaanermut misissuiffissatut aamma atussallugit. Aanguaq Atanaaq oqarpoq.
Nunatsinnit aallarlutik nuuttartut amerlassusii ukiuni 18-ni kingullerni allannguuteqangaarsimanngilat. Naatsorsueqqissaarnerit 1993-miit takutippaat, nunatsinniit aallartartut tikittartunit amerlanerujuartut, tassa 2011-mi nunatsinnut nuuttut 2.283-iupput, illuatungaanillu 2.442-t nunarput qimallugu aallarlutik
