Suliffissaaleqisut amerlisarlutillu ikilisarput

Qaammammit kingullermit suliffissaaleqisut ikileriarsimagaluartut, taamaattoq 2011 juunip qaammataanut sanilliutissagaanni suliffissaaleqisut 9 procentimik amerleriarsimapput. Ukioq kingulleq suliffissaaleqisut 2.425-usimasut juunip naanerani ukioq manna 2.640-nut amerliariarsimallutik.
Allattoq Peter Troelsen, Salome Hansen
juulip 23-at 2012 13:32

Tamannalu Nuummi pitsaasumik inissisimanngilaq. Maannami Nuummi suliffissaaleqisut 663-upput. Tassalu nuna tamakkerlugu suliffissaaleqisut sisamaraarterutaat Nuummi suliffissaaleqisuupput. Avannaani tunumilu suliffissaaleqisut amerleriangaatsiarsimapput, akerlianilli Sisimiuni Nanortalimmilu suliffissaaleqisut ikileriaateqalaarsimasut.

Qaammat kingulleq ukiup siulianut sanilliullugu inuit suliffissaqartut 258-nik amerlanerupput. Tamannali tuppallersaatissaanngilaq. Tassami juunip qaammataani Nuummi inuit suliffissaaleqisut ukiup siuliinut sanilliutissagaanni suliffissaaleqisut 87-nik amerlanerupput. Tamannali Sisimiuni Ilulissanilu ajunnginneruvoq, ukiumummi siulianut sanilliullugu sumiiffinni taakkunani suliffissaaleqisut ikinnerummata.

Nuummi SIK-mi ilaasortat suliffissaaleqisut amerlasimanngillat, ilaasortallu suliffissaaleqisuusut sumiiffinni allani allassimasuutigineqarsimassapput.

Nunatsinni suliffissaaleqinermi kisitsisit nutaat uani takueqarsinnaapput www.stst.gl-mi.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq