Suliffissaaleqisut amerlerialaarput

Ukiuni kingullerni nunatsinni suliffissaaleqisut amerliartorput, 2003-milu amerlanerpaasut nunatsinni naatsorsueqqissaartarfimmiit saqqummiunneqarpoq.

2002-miit 2003-mut suliffissaaleqisartut agguaqatigiisillugu qaammammut 118-nik amerleriaateqarsimallutik. Suliffissallu aamma 2.procentimik ikilisimasut naatsorsueqqissaartarfik allappoq.

Suliffillit eqqarsaatigalugit 47,3 procentit Pisortat suliffeqarfiini atorfeqartuuput, Suliffeqarfiillu tassani pineqartut tassaaput peqqinnissaqarfik, ilinniartitaaneq allalluunniit pisortani ingerlatsiviusut.

Suliffigineqarnerpaanut tulliupput niivernermik ingerlatsiviit Pilersuisoq Pisiffik Brugsen-ilu. Taakkunani suliffillit nunatsinni sulisut ataatsimut isigalugit 10,6 procentiupput.

18,6 procentit suliffeqarfinni assigiingitsuni atorfeqarput, sanaartornermilu ingerlataqartut 2003-mi 7,4 procentiullutik, taakualu ukiumut siulianut sanilliullugit amerleriatsiarsimapput.

Uummasuuteqarnermik, piniarnermik aalisarnermillu ingerlataqartut 2003-mi 6,9 procentiupput.