Suliffissaaleqinerup akiorniarneqarneranut million kr-nit arlaqartut atorneqarsimanngillat

Tamanna illuatungiliuttut partiiannit IA-mit mamiatsaatigineqarpoq, suliffissaaleqinerup akiorniarneqarneranut periusissamik pilersaarut aamma aningaasat qanoq atorneqarsimanersut paaserusunneqarpoq. 

IA-mi politikikkut oqaaseqartartup  Naaja Nathanielsenip  siusinnerusukkut partiimit oqaatigineqareersut uteqqikkusuppai.

- Periusissiamik pilersaarusioraanni tamanna piviusorsiortuusariaqarpoq.

Naatsorsuinermi tunngavigineqartut ajunngitsuusariaqarput.

-  Oqaannartoqarsinnaanngilaq aningaasat ima amerlatigisut uunga atoratsigit  tanngassimaaarutigaarput,  Naaja Nathanielsen oqarpoq.  

Suliffissaaleqisut suliffissaqalernissaannut suliffiillu nutaat pilersinneqarnissaannut 175 million kr-nit atorneqartussatut qulakkeerinnittoqarpoq.

Kisianni tassa ataatsimoortumi missingersuusiamit 59 million krnit kisimik atorneqarput taakkualu suliffissaaleqisut ikiorneqarnissaannut atorneqarlutik.

Aamma atuaruk Suliffissaaleqinermut akiuiniarlutik suliniuteqartut

- Aningasaliissutigineqartut kommuneni malugineqartussaapput taamatullu suliffissaaleqisuni, tassuunatigut takutinneqarluni qanoq iliuuseqartoqartoq, Naaja Nathanielsen oqarpoq.

Isornartorsiuneq tunngavissaqanngitsoq Aningaasaqarnermut Naalakkersuisoq Anda Uldum, isumaqarpoq.  Pissutsit assigiingitsut arlaqartut aporfigineqarput aningaasat tamakkiisumik atorneqannginnerannut.

Aamma atuaruk Naalakkersuisut Narsami suliffissaaleqisut immikkut ittumik suliniuteqarfigileraat
- Silap ajornera pissutigalugu suliassat amerlasut aallartinneqarsinnaasimanngillat.

Assersuutigalugu umiarsuit avannaannut tikissinnaasimanngillat, tamannalu eqqarsaatigineqartariaqarpoq.

Tassalu oqartoqarsinnaavoq tamakkua ilimagineqareersimassasut:  aningaasat ajunnginnerusumik atorneqarsimasinnaagaluarput allatulluunniit aaqqissorneqarsimasinnaagaluarput suliffissaaleqisut ikilisinniarlugit ?

- Naamik ajunngilluinnartumik pilersaarusiorneqarsimapput pilersaarutigineqartullu malillugit ingerlanneqarmata tamanna tatigivara.

Aningaasaqarnermut Naalakkersuisoq Andreas Uldum taama oqarpoq erseqqissaatigaalu suliat ingerlanneqarmata.  

Aningaasat allatut atorneqarsimasinnaagaluartut IA-mit qularutigineqanngilaq.

- Paasissutissiissutigineqartartut taakkuujuarput: ilinniartitaanerup qaffasissussia qaffaneqartariaqarpoq taava suliffissaaleqisoqassanngilaq.  Meeqqat atuarfii pitsaanerusut amerlanerusut ilinniartillugit realkompetanceløb.

Naaja Nathanielsen IA suleqatitsinnut Andrea Christensenimut aamma Sandra Meineckemut taama oqarpoq.
    
Suliffissarsiorlutik nalunaarsimasut qaammat kingulleq 3.953-upput.

Siorna qaammatip taamaalinerani suliffissiorlutik nalunaarsimasunit 432-nik ikinnerullutik.