Suliffissaaleqineq ernumalersitsivoq
- Upernavik Kujallermi aamma Kangersuatsimi tunitsiviit matoqqatinneqarneri innuttaasunut annertoorujussuarmik eqquisuupput, pingaartumik aalisartunut, piniartunut inuussutissarsiuteqartunullu taakkualu ilaqutaannut, Upernavik Kujallermi Kangersuatsiamilu nunaqarfinni aqutsisut siulittaasuat Lea Kristensen taama oqarpoq, taassumalu ernumanassutigaa Qaasuitsup kommuniani nunaqarfinni suliffissaaleqisut marloriaatinngorlutik oktoberimi 526-inngormata.
Upernavik Seafoodip nunaqarfinni tallimani tunitsivii tallimat umiatsiaararsortut qaleralittassaasa nungunneqarnerisa kingorna matuneqarput, soorlu aamma Kullorsuarmi tunitsivik matuneqartoq. Kullorsuarmiu Thimothæus Petersenip, Qaasuitsup kommuniani kommunalbestyrelsemi ilaasortap, umiatsiaararsortunut qalerallit pisassat ikippallaarsorai tamannalu suliffissaaleqisut amerlinerannut tunngaviutillugu.
- Tamannalu assut ajuusaarnarpoq, maanna ukiukkut taamaalernerani inuuniarnikkut oqimaalleruttornerani taamatut pisoqarnera, Thimothæus Petersen oqarpoq.
Qaasuitsup kommuniani isumaginninnermut ikiorsiissutinik aningaasartuutit septembarimi 600.000 koruuniupput, oktoberimilu ikiorsiissutinut aningaasartuutit 1,6 koruuniulerlutik. Upernavik Kujallermi Kangersuatsiamilu nunaqarfinni aqutsisut siulittaasuata Lea Kristensenip nunaqarfinni suliffissaaleqinerup akiorniarneranut iliuusissaaleqivoq, tassami kommunemiit siunnersorneqarnissaq amigaatigaa.
-Taakkua pilersaarusiorneqarneranni innuttaasut tamaasa attorlugit iliuuseqarsinnaaneq taanna amigaataasorujussuuvoq. Malugisanngilagut taakku suliffissaqartitsiniutitut taaneqarsinnaasut, kommunip aningaasaliiffigisinnaasaralui Namminersorlutillu Oqartussat, annertunerusumik malugisanngilagut, Lea Kristensen oqarpoq.
Qaleralittassat nungunneqarnerisigut nunaqarfinni suliffissaaleqisut amerleriarnerat Qaasuitsup kommuniata aningaasaqarneranut sunniuteqaratarsinnaanera, Kullorsuarmiup Thimothæus Petersenip eqqarsaatigaa.
- Naluarput kommunip karsiata nammassinnaaneraa maannamut killiffipput qiviarutsigut, Thimothæus Petersen oqarpoq.