Suliffissaaleqineq akiorniarlugu millionilikkaanik aningaasaleeqqusipput

Aatsitassarsiornermi aamma uuliasiornermi ingerlatani suliffissaqartitsiniarnermut sammitinneqassapput,  Inuussutissarsiornermut Aatsitassanullu Naalakkersuisoqarfimmit taamatut paasissutissiisoqarpoq.

Suliffissaaleqisut sapinngisamik ikinnerulersinniartariaqarput. Immikkut ittumik iliuusissatut pilersaarut atorlugu ineriartorneq pitsaanngitsup ilorraata tungaanut saatinnissaanut periarfissaqarpugut, Inuussutissarsiornermut Aatsitassanullu Naalakkersuisoq Ove Karl Berthelsen oqarpoq.

Iliuusissatut pilersaarummi suliffissaaruttut isumagineqassapput, siullermeerlutik Suliffissarsiuussisarfimmut isernerminniit, piginnaanngorsaqqillutik ingerlaqqinnerminni, nutaamik suliffeqalernissamik tungaanut.

Suliffissaaleqisut pikkorissartinneqarnerisigut  siunnersorneqarnerisigullu  ingerlariaqqinnissamut aqqutissiuunneqartassapput, taamaaliornikkut innuttaasut ataasiakkaat siunnerfissamik nutaamik tunngaveqarlutik ingerlaqqissinnaanngortillugit.

Uuliasiornermi aatsitassarsiornermilu nunaqavissut suliffissaqartinneqarnissaat naalakkersuisut iliuuseqarnerannut tunngaviuvoq.

Nunatsinni Sulisitsisisut Peqatigiiffiata GA-p aamma Sulinermik Inuussutissarsiuteqartut Kattuffiata SIK-p suliffissaaleqisut amerliartuinnarnerisa Naalakkersuisuinit iliuuseqarfigineqarnissaannut  kissaateqarnertik msajimi saqqummiuppaat.

Illoqarfinni Nuup avataaniittuni suliffissaaleqinerup annertusinerata kingunerisaanik Nuup nunattalu sinnerani naligiikkunaarneq annertusiartorpoq, SIK-ip siulittaasua Jess. G Berthelsen aamma GA-p pisortaa Henrik Leth taamani oqarput.

SIK aamma GA isumaqarput sanaartornermik suliat amerlanerusut aallartinneqarpata suliffissaaleqineq annikinnerulissasoq.