Suliffissaaleqinavianngillat
Tallimanngorneq juunip qulingat nalunaaqutaq qulinut Isumaginninnermik Ikiortinngortut katillutik 28-it ukiut marluk Perorsaanermik Ilinniarfimmi (PI/SPS) ilinniarsimanerminnik uppernarsaammik allagartartaartinneqassapput.
Amerlanerit ilaquttatik ukiup affaa qimassimallugit qitiusumik ilinniarfimmeereerlutik Isumaginninnermik Ikiortinngorsimallutik angerlartussanngorput. Tamanna amerlanerit soorunami qilanaareqigaat Perorsaanermik Ilinniarfimmi pisortaq Nuka Kleemann oqarpoq.
Pisortaq isumaqarpoq, ilinniagaqarnissaminnik taamak annertutigisumik kissaateqarnerat takussutissartaqartoq.
- Inuttut nammineq annertuumik pilliuteqarput, ilaquttatik, meeqqatik avatangiisertillu sungiusimarsartik ukiup affaa qimaqqasarmassuk, oqarpoq.
Isumaginninnermik Ikiortinngortut inulerinerup iluani suliffissaaleqinavianngillat. inulerisut ullumikkut Nunatsinni suli amingaataaqimmata.
- Ilinniartut naammassisut angusarissaarluarput, taamaattumik neriuuteqarpugut siunissami ilinniaqqinnissaminnut pilersaaruteqassasut. Ukiuni makkunani ilinniaqqinnissaq periarfissaallualernikuummat, soorlu socialassistent-itut imaluunniit perorsaasutut, Nuka Kleemann oqarpoq.