NUUMMIIT NUUNNEQ Suliffinnik nuutsitsinissat qanoq akeqassanersut suli missingersorneqanngillat

Nuummi suliffiit 600-t nuunneqarnissaannik borgmesterit pingasut siunnersuutaat Nunatta naligiinnerusumik ineriartortinneqarnissaanik siunertarpoq. Nuutsitsinissalli qanoq akeqassanersoq suli missingersorneqanngilaq.

Nuummi suliffiit 600-t illoqarfinnut allanut nuunneqarnissaat, Qeqqata Kommuniani, Qaasuitsup Kommuniani Kommune Kujallermilu borgmesterit siunnersuutigaat.

Taamaalilluni Nunarput naligiinnerusumik ineriartortinneqarsinnaasoq, borgmesterit isumaqarput.

Nunarput maannatut ineriartortinneqassappat Nunatsinni akerleriinniarnerit pisinnaasut, Qeqqata Kommuniani borgmesteri Hermann Berthelsen isumaqarpoq.

-Assigiinngippallaamik ineriartortitsinerup kingunerissavaa, sinerissami toqqissisimannginneq, aammalu immaqa akerliuniarnerit ataatsimuunnginnerillu. Nunarsuarmi oqaluttuarisaanerup takutereerpaa, nunap immikkoortuisa assigiinngippallaaleraangata taava mumisitsinerit aammalu akerleriinnerit, allatut piniarnerit pisarput. Aamma tamakku tikittooqinagatsigit massakkut arlaannik iliuuseqanngikkutta, Hermann Berthelsen oqarpoq.

Aamma atuaruk Borgmesterit: Atorfiit Nuummit nussornerisigut Nunarput naligiinnerulersinneqassaaq

Kisianni suliffiit nuunneqarnissaat qanoq akeqassanersoq, suli missingersuusiorneqanngitsoq, Hermann Berthelsenip aamma oqaatigaa.

- Naamik missingersuusiunngilarput. Una tuniniarlualaariarlugu paasinarsippat missingersuusiorneqarumaarpoq. Naalakkersuisunit Inatsisartuniillu akuerineqarpat, taava missingersuutit allallu tamakku suliarineqarumaarput, Hermann Berthelsen oqarpoq.

Aamma atuaruk Suliffiit 600-t nuunneqarnissaannik siunnersuut

Siunnersuutertillu piviusorsiortoq borgmesterit isumaqartut Hermann Berthelsen oqarpoq. Norgemi Danmarkimilu misilittakkat naapertorlugit, suliffinnik nuutsitsineq akisusinnaapput, Nunattalu aningaasaqarniarnera maanna ilungersunartumik inissisimareerluni.

Borgmesterilli siunnersuutaat isumaqatigiinninniarnerni tunngaviussatut saqqummiunneqartoq, Qeqqata Kommuniani borgmesteri oqarpoq.

- Uagut suliassaq soorunami ingerlateqqissavarput. Taamaammat kattuffiit, suleqatit allallu uani isummami suleqatiginissaat pissanganartorujussuussaaq. Soorunami ima kipparitsigissanngilagut, una inernera taamaaqqeqqissaassasoq, kisianni una isumaa aallaavigissavarput, Qeqqata Kommuniani borgmesteri Hermann Berthelsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat