Suliffimmut atatillugu init isumalluutigineqarpallaaqaat

Kalaallit Nunaannut suliartortut ineqartinneqartarnerat maleruunneruinnaavallaartoq, Aningaasaqarnermut Naalakkersuisoq, Palle Christiansen isumaqarpoq.

Nukissiorfimmi sulisut marluk ineqartitaanerup aaqqissuussaanera pillugu isornartorsiuinerannut Naalakkersuisoq akivoq, ajornanngitsoq nammineerluni inissianik inuinnaat attartortittagaannut inissarsiornissaq.

Nukissiorfimmi atorfilik, Thomas Allan Rasmussen KNR-imut ima oqarpoq:

- Kalaallit Nunaannut tikikkama pitsaasumik ineqartitaanera nuannaarutigeqaara. Taamaattoqarnera pissutaalluni Kalaallit Nunaanniilernera toqqissisimanartumik aallartippoq. Muminneqarlunilusooq pivoq, inissiamut arlallit najugarisaannut inissinneqarama, naak tamanna uanga nammineq qinigarinagu, Thomas Allan Rasmussen oqarpoq.

Taassuma ilanngullugu oqaatigaa, pinngitsaalineqapajaarluni allanik najugaqateqalernerup kingunerisinnaagaa allatut ajornartumik angerlaannartariaqalerneq.

Aningaasaqarnermut Naalakkersuisoq Palle Christiansen tamatumunnga ima akivoq:

- Naatsorsuutigeriigaannut aammalu neriorsorneqarnerannut naleqqiullugu allatut inissisimalernerannut naammagittaalliuutaat paasilluarsinnaavara, allatulli ajornartumik inissiaateqalernissarput utaqqisariaqarpaat. Taamatut oqareeraanni oqaqqittariaqarpoq, ajornanngitsoq namminneq inissaminnik nassaarsinnaanerat. Kalaallit Nunaanni ajornartorsiutigaarput suliartortut tamarmik naatsorsuutigisarmassuk inissaqartinneqarnissartik, taama eqqarsartarneq qimanneqartariaqarpoq, Palle Christiansen oqarpoq.

Nuummi inissiat, inuinnarnik attartortinneqartartut akisuallaarneri pinngitsuugunigit Thomas Allan Rasmussenip eqqarsaatigigaluarpaa taamaattumik attartornissani.

Tamatunnga Palle Christiansen ima akivoq:

- Nunatsinni najugaqareersut amerlaqisut namminneq akilikkaminnik najugaqarput. Nunatsinni inissaaleqinerup pilersitaanik inissiat attartorneqartartut akisupput. Taamaattumiguna maanna maani Nuummi sulisut inissiaannik sanaartorneq ingerlanneqartoq, aammalu nalinginnaasumik utaqqisut inissiaannik sanaartortoqarluni. Taamaaliornitsigut anguniarparput kikkut tamarmik akilersinnaasaannik najugassaqartitsilerneq, Palle Christiansen oqarpoq.

Taassuma aamma naqissuserpaa, paasilluarsinnaagamiuk sulisut tikerlaat pakatsisarnerat. Ilanngullugulu oqarluni sulisussanik amigaateqarnerujussuup ilaatigut kingunerigaa inissaaleqinerujussuaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat