Suliffillit akileraarnikinnerusalissasut
Suliffeqarneq pisortanit ikiorsiissutinik pisartagaqarnermit malunnaatilimmik akilersinnaanerulersinniarneqarpoq.
Demokraatit ukiuni arlaqalersuni tamanna siunnersuutigisarpaat, siunnersuutaallu Naalakkersuisut politikkiannut maanna ilaalersimavoq. Tamanna Aningaasaqarnikkut Ingerlatsineq pillugu Nalunaarut 2015-imi, Naalakkersuisut suliarisimasaanni atuarneqarsinnaavoq.
Nalunaarummi siunnersuutigineqarpoq suliffillit suliffeqanngitsunut, utoqqalinersialinnut aammalu siusinaartumik pensionisialinnut naleqqiullugit akileraarutinik A-nik akiliinikinnerulissasut. Taamaaliornikkut amerlanerusut sulilersinneqarnissaat siunertarineqartoq oqaatigineqarpoq.
Periarfissat pingasut
Naalakkersuisut ilusiliat assigiinngitsut pingasuusut ilaat ataaseq atorniarpaat:
Ilusiliami siullermi, suliffillit tamarmik akileraarutitigut ilanngaammik tunineqassapput, isertitaat procentinngorlugu aalajangersimasumik annertussulimmik ilanngaateqartillugit.
Ilusiliap aappaani, akissarsiat qaffakkiartortillugit ilanngaat annikilliartortinneqartassaaq. Assersuutigalugu ukiumut 250.000 koruuninik isertitaqaraanni ilanngaat taanna atorunnaavissussalluni.
Ilulisiliat pingajussaanni kingullermilu, akissarsiakinnerpaat kisiisa ilanngaammik tunineqassapput. Taamaaliornikkut pisortanit ikiorsiissutinik pisartagaqartut amerlanerusut sulilersinneqassapput, Naalakkersuisut taama isumaqarput.
Sulinermut ilanngaammik atuutilersitsinissamik siunnersuut suliffeqarnerup isumaginninnerullu iluani aaqqissuusseqqinnernut allanut peqatigitigillugu pissaaq. Aningaasaqarnikkut Ingerlatsineq pillugu Nalunaarut 2015 Inatsisartuni marlunngorpat oqaluuserineqassaaq.
