Suliffiit tusindillit
- Aatsitassarsiorniarlutik qinnuteqartut akuerineqassappata, taava aatsitassarsiorfiit pilersinniarneranni suliffissat tusindit arlallit piulissapput. Taava taakkunani pingasuni aatsitassanik piiaasoqalissappat, massakkut naatsorsuigallarnerit aallaavigalugit inuit 1000-it missaat sulisorineqalernissaat naatsorsuutigineqarpoq,
Ove Karl Berthelsen oqarpoq.
Aatsitassarsiorfinni namminerni suliffissat saniatigut, aamma suliffiit allat 2000-it missaat, aatsitassanik piiaanerup avataani pile4rsinneqassasut taassuma aamma naatsorsuutigaa.
Aatsitassarsiorniartut assigiinngilluinnartut pingasut uani pineqarput. Taakkua misissuinissamik akuersissutitik piiaanissamik akuersissummik tarserniarlugit ukioq naanngitsoq qinnuteqassasut, Ove Karl Berthelsenip naatsorsuutigaa. Tassalu aamma ilimanarluarpoq, qinnuteqaataat akuerineqassasut.
London Mining Nuup kangerluani Isukasiani saviminissamik piiaaniarpoq. Ironbark Tunup avannaani Citronen Fjord-imi aqerlumik zinkimillu piianiarpoq. Kiisalu Pimbal Kujatani Kilavaani issormik qaqutigoortumik atsitassartalimmik piianiarluni.
Inuillu suliffissaqarnerulernissaat Nunatsinnilu aningaasaateqarnerulernissaq Ove Karl Berthelsen-ip nuannaarutigaa. Kisianni neriorsuivoq, qilanaarnerup pianik ilaatigut avatangiisit pillugit misissuinissamik innuttaasullu tusarniarnissaannut piumasaqaatit qasukkarneqassanngitsut.
- Ersseqqissassavara, avatangiisinut sunniutaasinnaasunik nalilersuinerit aammalu suliffeqarfiulersussat inuiaqatigiinnut sunniutigisinnaasaat, arlannaannulluunniit attuumassuseqanngitsunit nalilersoqqissaarneqassammata. Taamaalereerpallu inuiaqatigiit aamma tusarniarneqassapput.
London Mining qanittukkut naliliigaluarpoq, misissueqqaarnitik ukiup naalerneranni aatsaat piariissasut, kisianni tassa Ove Karl Berthelsen naliliivoq, piiaanissamut akuersissummik ukioq naanngitsoq qinnuteqarsinnaasut .
Kisianni Naalakkersuisunut ilaasortap neriorsuutigaa, nunatsinni najugaqartut sapinngisamik sulisoriniarneqassasut. Nassuerutigaali suliassat aalajangersimasut nunani allaneersunit suliarineqartariaqarsinnaasut.
