Suliffiit pillugit nuttarsinnaaneq isumaqatigiissutigaat
Partiit amerlanerussuteqarluartut, Partii Inuit minillugit, allannguutissatut siunnersuummut tapersersuipput, aappassaaneerneqannginneranilu Inatsisartut Inuussutissarsiornermut Ataatsimiititaliaani suliareqqullugu:
- Una aqqutissiuussivoq assersuutigalugu kujataani imaluunniit avannaani najugalik tunitsivimmut illoqarfimmi allami sulisussaaleqisumut aasaanerani nuukkallarnissaq, taavalu utimut angerlamut akiliunneqarluni inatsit una aamma aqqutissiuussivqo, tassa suliffissaaleqinerup akiorniarneqarnerani eqaallisaanermik aamma imaqarpoq, suliffeqarnermi innersuussisarnermut inatsimmut allannguutissatut siunnersuut, Naalakkersuisut sinnerlugit saqqummiutereeraalu, Inuussutissarsiornermut Aatsitassanullu Naalakkersuisoq Jens-Erik Kirkegaard, oqarpoq.
Siunnersuut saqqummiunneqartoq annertunerpaatigut suliffeqarnermi innersuussisarneq pillugu Inatsisartut peqqussutaannit atuuttumit 2004-meersumit issuaaneruvoq, inatsisilli atuuttup taassuma ilaanni allannguuteqartitsinissaq pisariaqarpoq, pissutigalugu nuttarnerulersitsiniarluni tapiissutinik tunniussinissamut periarfissani naapertuutinngitsumik killilersuinertaqartoq paasineqarmat, allannguutissatut siunnersuummi ilaatigut allassimavoq.
Siunnersuut Inatsisartuni oqallisigineqarmat, oqallinneq Nunatsinni suliffissaaleqinerujussuup tunngaanut saatinneqapallappoq, Naalakkersuisullu qanoq iliuuseqarfiginiarneraat apeqqutigineqarluni. Illuatungiliuttut, Inuit Ataqatigiit siuttoralugit, allaat oqaatigaat Naalakkersuisut pilersaarutinik ataqatigiissunik saqqummiussaqarsimanngitsut.
Jens-Erik Kirkegaardili tassunga atatillugu oqarpoq Naalakkersuisut suliffissaaleqinerup akiorniarneqarnissaa pillugu pilersaarusiornikuusut, aningaasat taakkununnga atorneqartussat aningaasanut inatsimmi immikkoortinneqarsimasut:
- Suliffissaaleqineq akiorniarlugu suligasuartitsineq annertooq ingerlavoq, tassanilu immaqa aamma ujartorneqartoq una aamma pilersaarutit saqqummiunneqarnissaat erseqqaarinnerusunngorlugit, tusagassiuutitigut allatigullu immaqa ingerlanneqarsinnaasut taanna ujartorneqartoq malugivara, aamma taanna sulissutigissavarput, Inuussutissarsiornermut Aatsitassanullu Naalakkersuisoq Jens-Erik Kirkegaard, oqarpoq.
Suliffeqarnermi innersuussisarneq pillugu peqqussummut allannguutissatut siunnersuut, pilersaarutit malillugit pingasunngornermi apriilip ulluisa 30-anni aappassaaneerneqassaaq, tungaanullu tassa Inatsisartut Inuussutissarsiornermut Ataatsimiititaliaanni suliareqqaarneqartussanngortinneqarluni.
