Suliffiit ataavartut kissaatigineqarput

SIK-p ataatsimeersuarnera aqagu aallartippat, immikkoortortaqarfinni aggersut ilaat Jakob Zeeb, Uummannameersoq, siulersuisunut piumasaqarniarpoq siunissaq ungasinnerusoq eqqarsaatigalugu SIK-p pilersaarusiortarnissaa.

- Nunatsinni ilaasortatta ukioq naallugu suliffissaqartarnissaat pingaarnerpaatut siunniussimavarput, Uummannami SIK-p immikkoortortaqarfiani siulittaasoq Jokum Zeeb oqarpoq, nangillunilu; - Suliffissuit ikerinnakkut matugaangata, SIK-mi ilaasortat akiligassaat annikillisarneqarneq ajorput, aammalu annertussusileriikkanik ikiorsiissutinik pisinnaasaratik, taamaattumik isumaqatigiinniarnissat aqqutigalugit pissutsit taamaattut aaqqinniarneqartariaqarput, Jokum Zeeb oqarpoq. Ilanngullugu aamma oqaatigineqarpoq, ilaasortat akiliisarnermikkut PBS aqqutigalugu akiliisinniarneqartalernissaat misissorluarneqartariaqartoq, PBS-i aqqutigalugu akiliinermi ilaatigut 15 koruunit 30 koruunillu akornanni ilaasortat akiliinerulersarmata.

SIK-p ataatsimeersuarnera aqagu Qaqortumi aallartippat immikkoortortaqarfiit 35-it peqataatitaqassapput, siulersuisunilu ilaasortat qulingiluaassallutik. Ataatsimeersuarneq ulluni pingasuni ingerlanneqassaaq.