Suliffeqarfissuit unammilleqatigiinnermut ataatsimiittaliamit uparuarneqarput

Tamanna Unammilleqatigiinnermut ataatsimiititaliap ippassaq aalajangerpaa.

Tele Greenlandip, Royal Greenlandip kiisalu KNI-p unammilleqatigiinnermut inatsisit unioqqutissimagamikkit niuernerminni eqqarsariaasertik allanngortissagaat erseqqissumik peqqussutigineqarpoq.

Tele Greenland eqqarsaatigalugu suliffeqarfiup unammillertini Nuummi Nuussuarmilu internetikkut aqqusersuiniartut akornusersorsimavai. Immap naqqatigut kabeli aqqutigalugu internetikkut aqqusersuinissamut neqerooruteqarsinnaanermi pinngitsoorneqarsinnaanngitsoq, qanoq akeqassanersoq suliffeqarfiup nalunaarutiginaveersaarsimavaa.

Unammilleqatigiinnermut ataatsimiititaliap Tele Greenland peqquaa ullut 14-it qaangiutsinnagit kabelip atornissaanut akimik neqerooruteqaqqullugu.

Taassuma assigisaanik Royal Greenlandip tunisassiornermi annersaanini aamma atornerlussimavaa. Royal Greenlandip aalisartut namminerminnut nipisaat suaannik tunisisut aasaanerani saarullinnik tunisiniarneranni salliutinniarsimavai. Tamannalu ersarissumik inatsisinik unioqqutitsineruvoq.

- Royal Greenlandip aasaanerani saarullinnik tunisassiorfittut annersaanini nipisaat suaannik tunisassiornermi unammillertiminut atornerlussimagaa, Unammilleqatigiinnermut ataatsimiititaliaq allappoq.

Royal Greenlandip taamatut inissisimanerminik atornerluinerminik unitsitsinissaminik aamma ullunik 14-inik piffissalerneqarpoq.

Isumalioqatigiissitap pingajuattut aalajangiineratigut, KNI-p Nuuk Imermiit tunisassianik kisermaassilluni pisisinnaanerminut isumaqatigiissuteqarnera unitseqquneqarpoq.

Immiaaqqanik imeruersaatinillu Nunatta kitaani kisermaassiluni KNI-p pisisinnaanini siaruarterisinnaaninilu, ukiuni 23-ni ingerlassimasani maanna unitsissagaa Unammilleqatigiinnermut ataatsimiititaliap aalajangerpaa.

Taamatut kisermaassinissaminut - unammillernissamullu aalajangersakkat assigiinngitsut maannakkut naapertorlugit ingerlatsinini KNI-p unitsissagaa ataatsimiititaliamit aalajangerneqarpoq.

- Unammilleqatigiinnermut ataatsimiititaliap aalajangiineratigut ukiuni 23-ni Nunatta kitaani immiaaqqanik imeruersaatinillu KNI-p pisisinnaaneranut siaruarterisinnaaneranullu isumaqatigiissut taamaalilluni unitsinneqarpoq. Taamatut isumaqatigiissuteqarsimanera naapertorlugu Nunatsinni pisiniarfiutillit allat toqqaannartumik Nuuk Imermiit immiaaqqanik imeruersaatinillu pisisinnaasimannginnerat Unammilleqatigiinnermut ataatsimiititaliap aalajangernerminut peqqutaatippaa.

Taamatut peqqusineq kingusinnerpaamik ukiormanna septembarip aallaqqaataanni atuutsineqalissaaq.

Unammilleqatigiinnermut ataatsimiititaliap KNI-p isumaqatigiissuteqarnera siornatigut suliarinikuuaa. Taamanili KNI unammilleqatigiinnermut inatsimmit killilersorneqarsinnaannginneraraluarpoq, Namminersorlutik Oqartussanit pigineqarnini pissutigalugu "pisortanit killilersorneqareerami". Østre Landsretimili 2008-mi aalajangerneqarpoq KNI pisortanilluunniit pigineqaraluaruni unammilleqatigiinnermut inatsisit naapertorlugit ingerlatsisariaqartoq.