Suliffeqarfimmi pissutsinik isornartoqartillugu oqaatilliisoq
Nunatsinni suliffeqarfinni oqartussallu pigisaanni suliffeqarfinni, sulisut pisinnaatitaaffeqartariaqartut, taakkunani inatsisinik unioqqutitsisoqarsimatillugu, nipangiussisussaatitaanerlu innarlernagu oqaatilliisinnaanissaq, Naaja Nathanielsenip, IA-meersup siunnersuutigaa.
- Inuit ilaasa whistlebloweri, oqaatilliisartutut taarusussinnaagaluarpaat. Taamaattorli tamatsinnut iluaqutaasumik inatsisinik unioqqutitsilluni imaluunniiit nangaanarsinnaasunik iliuutsit unitsinniarlugit iliuuseqartoqarpat, tamanna inuiaqatigiittut taamaaliorsinnaaneq tapersersortariaqarparput, Naaja Nathanielsen siunnersuumminut tunngavilersuivoq.
Whistleblowerit ilaat oqaluttuarisaanermi tusaamasaanerit ilagaat, isertortumik paasiniaasartoq, Frank Grevil aamma FBI-p pisortarisimasaa, Mark Felt. Taakkua Watergate-imi kusanaatsuliaq pillugu tusagassiortunut marlunnut oqaluttuarput.
Ullumikkut inatsisit naapertorlugit, suliffeqarfik pineqartoq inatsisinik unioqqutitsisimasoq nalunaarfigineqartartussaavoq, tamatumunnga pissutaavoq unioqqutitsisoqarsimatillugu inuk pineqartoq nalunaarfigineqartussaatitaammat.
Tamannalu allanngortissappat Qallunaat inunnut ataasiakkaanut nalunaarsorsimaffiat nalunaarsuffiit pillugit inatsimmik taarseneqartariaqartoq.
Siunenrsuut tamanna Inatsisartuni aqagu sammineqassaaq.