Suliffeqarfik: Pikkorissartitsinissat pisariaqartippavut

Suliniutit angisuut Nunatsinni aallartippata, Nunatsinni suliffeqarfeqarfiit mikisut anginerumaallu, kisimiillutik sullissinissaminnut piareeqqanngillat, siunnersuisarfiup Rambøll-ip nalunaarusiaani, Namminersorlutik Oqartussanit suliaritinneqarsimasumi, taama naliliisoqarpoq. Nunatsinni suliffeqarfiit ataasiakkaaginnaat, aatsitassarsiorfissuarnut pilersuisinnaanissaminnut piginnaaneqartut nalunaarusiami aamma allaaserineqarpoq. Tamannalu pissutigalugu, Namminersorlutik Oqartussat piginnaanngorssaaneq siunertaralugu ukioq manna suliffeqarfinnik pikkorissartitsiniarpoq.
Allattoq Apollo Jeremiassen
marsip 07-at 2013 12:15

- Nørskov Gruppen Aps-imit pikkorissartitsinissat taperserparvut, tassami suliffeqarfiit ataasiakkaat pisariaqartippaat arlalilullutik suleqatigiillutik sullissisinnaalernissaat.

Nørskov Gruppen Aps-imi, Qaqortumi suliffeqarfiup siulersuisuisa siulittaasua, Alex Nørskov pikkorissartitsinissanut qilanaaqisoq oqarpoq.

Nørskov Gruppen Aps suliffeqarfiuvoq 35-nik sulisulik. Suliniutillu angisuut aallartilerneranni sullissinissat soorlu pilersuinerit sanaartornerillu assigiinngitsut neqeroorutigisinnaallugit.

- Taamaattumik uanga isumaga malillugu pisariaqarpoq suliffeqarfeeqqat suleqatigiillutik sullissilernissamut isumaqatigiissusiornissaat ilikkassallugu aamma piginnaanngorsaaneq pisariaqarluinnartoq ilikkassallugu pingaaruteqarmat.

Nørskov Gruppen Aps-imi siulersuisut siulittaasua, Alex Nørskov oqarpoq.

Nunatsinni suliniutinut annertuunut sullissisinnaanissamut piginnaanngorsaanerit siunertarineqarlutik, pikkorissaanerit arlallit ukiup massuma ingerlanerani pissasut, Namminersorlutik Oqartussanik siunniunneqarpoq, Inuussutissarsiornermut Oqartussaqarfimmi pisortaagallartoq, Tine Jensen taama oqarpoq nangillunilu oqaatigalugu, pikkorissartitsinermi suleqatissarsiorsinnaanerit pingaartinneqarnerussasut.

- Nunatsinni suliffeqarfeeqqat kisimiillutik, suliassanut angisuunut neqeroornermi kingorna, suliassanik kivitsisinnaaneri nunarsuatsinni suliffeqarfinnut allanut naleqqiullugit unammillernartuusinnaavoq. Nunatsinnili suliffeqarfeeqqat arlaliit ataatsimoorlutik suleqatigiilerneranni suliassanik kivitsisinnaaneri annertusissaaq. Tassa ilaatigut tamanna siunertaralugu pikkorissartitsisoqassaaq aamma pikkorisarfigineqarsinnaassalluni nunarsuatsinni suliffeqarfinni isumaqatigiinniarnermut piginnaanngorsaanerit.

Inuussutissarsiornermut Oqartussaqarfimmi pisortaagallartoq, Tine Jensen taama oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq