Suliffeqarfik Nuuk Danmarkimi pikkorissarsimannginnerarpoq

Siunnersortitut suliffik Ramsdal politiinut suliassiissuteqarpoq. Siunnersortitut suliffik Ramsdal isumaqarpoq, februaarip qaammataani Suliffeqarfik Nuuk Danmarkimi pikkorissartitsisimasoq tamannalu miserratigineqartoq.

Nuup Kommunianiilli illuatungaanik isumaqarfigineqarpoq, Nuup kommuniani allaffissornikkut pisortaq Morten Kalhke ima oqarpoq.

Pikkorissarneq februaarimi pisimasutut oqaatigineqarpoq, tassa februaarip 21-niit 25-iata tungaanut. Inuillu aqqanillit aqqi Suliffeqarfik Nuummi sulisuusut peqataanerarneqarput. Taakku aperaagut pikkorissarnermut tassunga peqataasimasoralugit, tamarmillu naaggaarlutik akissuteqarput, taama oqarpoq Nuup kommunianeersoq Morten Kahlke.

Ramsdalimi siunnersorti Karl Erik Nielsen radio aviisimut uppernarsaavoq, februaarip qaammataani Suliffeqarfik Nuummi sulisut Danmarkimi pikkorissarsimasut.

Pikkorissartullu taakku nunatsinneersut Karl-Erik Nielsenip nammineq pikkorissarsimavai, taanna ima oqarpoq:

- Assut tupaallaatigaara pikkorissarneq taanna pisimanngitsutut apeqquserneqarmat, nammineerlungami pikkorissaasuuvunga.

- Siornatigut politiinut suliakkiissuteqarsimanngisaannarpugut, uanga isinnik Nuup kommuniata allaffissornikkut allaffeqarfia misissuisariaqarsoraara.

Morten Kahlke apereqqipparput Karl Erik Nielsenip oqaasianut qanoq akisinnaanersoq.

Karl Erik Nielseni taama oqarsimasinnaavoq, uagutsinnummi aamma oqarsimasariaqaraluarpoq. Oqareerpunga, aqqit aqqanillit taakkartugai uppernarsaatissaqartinngilagut.

Morten Kalhke apereqqipparput, Karl Erik Nielseni nammineq pikkorissartitsisuusimasoq inuillu taakku atuartissimammagit tamanna qanoq paasisariaqarsoralugu.

- Tamanna nammineq oqarneriinnarisimasinnaavaa, Nuup kommuniani atorfilik Morten Kahlke oqarpoq.