Suliffeqarfik Københavnimi Nunatsinnut attuumassutilinnut angallassisartoq

Nunatsinnut tunngasunik takusassarsioriartorluni Københavniliartoqarsinnaava? Aap, taamaaliortoqarsinnaavoq.

Suliffeqarfimmi "Københavnerture"-mi takornarianik angallassisartup tusagassiortullu Iben Danielsenip takornariat danskillu sumiiffinnut nunatta oqaluttuarisaaneranut attuumassuteqartunut angallattarpai.

Københavnimmi aqquserngi ikitsuinnaat ilisimasaqarfigisaannik oqaluttuassartaqarput, Iben Danielsen, allat pingasut peqatigalugit suliffeqarfimmik ingerlatsisuusoq taama isumaqarpoq.

- Københavnimi pisutsillunga kalaallimik allanilluunniit ullumi takusatsinnik takusaqaraangama (angallassinermi takusat, aaqq.), soorlu eqqumiitsulianik illunillu niuerfiusunik, taava oqaluttuarisaanitsinnut qanoq pingaaruteqartiginerat eqqarsaatigisarpara, KNR-imut taama oqarpoq.

- Danskit kalaallillu oqaluttuarisaanerisa ilaa taanna inuppassuit ilisimasaqarfiginngikkaat maluginiartarpara. Tamannaavorlu angallassisalerninnut pissutaasoq.

Oqaluttuarisaaneq attaveqalersitsisinnaavoq

Angallassinermi ilaatigut Nordatlantens Bygge, Savalimmiut Nunattalu sinniisoqarfigisaat, uniffigineqarpoq. Nunatsinni arfanniarnermit orsorpassuit umiarsuit 1900-kkut aallartinneranni Københavnimut tikiuttarpaat.

Københavnip umiarsualiviani oqaluttuarisaanermut pingaarutillit allat aamma nassaassaapput. Soorlu kalaallit Danmarkimut tikittut siulliit marluk, Pôq Qiperorlu, 1600-kkunni ikerasaliami qaannamik takutitsisarsimapput.

Aamma oqaluffik Holmens Kirke eqqaanngitsoorneqarsinnaanngilaq, Hans Egedemimmi ajoqersuiartornermillu oqaluttuat tassannga aallartiffeqarmata. 

Qanga pisimasut oqaluttuarinerisigut siunissaq Naalagaffeqatigiinnilu ataqatigiinnerput allanngortinneqarsinnaapput, Iben Danielsen taama oqaluttuarpoq.

- Eqqaamavara kingullermik angallassigama arlaat oqartoq meeqqap atuartup kialluunniit ilisimasaqarfigisariaqaraluarai. Taamatullu aamma uanga isumaqarpunga. Københavnimi Kalaallit Nunaannut attuumassuteqartunut angallasserusuppunga, aammali immitsinnut ilisimasavut eqqarsaativullu pillugit allannguisinnaanerlunga paaserusuppara.

Suliffeqarfik angallassisartoq “Københavnerture” Københavnimi allanik sammisaqarluni aamma angallassisarpoq.