Suliffeqarfik Kuannersualerisoq eqqartuussisuuneqarfiup eqqartuussutaanut qisuariartoq
Eqqartuussisuneqarfiup Inatsisartut aamma Namminersorlutik Oqartussat suliami Kuannersuarnut tunngasumi pinngitsuutinneqarnerat ippassaq nalunaarutigaa.
Suliassanngortitsinerli oqartussaasoqarfinnut tallimanut, tassaniittunullu naalakkersuisoqarfinnut pingasunut aqutsisoqarfinnullu marlunnut uninngilaq.
Aatsitassarsiornermi ingerlatseqatigiiffik Greenland Minerals, Energy Transition Mineralsimit pigineqartoq, suliassanngortitsisuuvoq.
Suliassanngortinneqartut arfineq-marluusut tamarmik eqqartuussisuneqarfiup eqqartuussutaata nalunaarutigineqannginnerani pinngitsuunerarput.
Naak suliassanngortitaasuni arfineq-marluusuni marluk ippassaq eqqartuussummi pinngitsuutitaagaluartut, pisortaaneq Daniel Mamadou naammagisimaarinnippoq. Tusagassiuutinut nalunaarummi taama paasissutissiivoq.
- Piumasaqaatigisatsinnut tunngatillugu inissisimalluarnitsinnik qularutiginninngivippugut suliamilu qitiusoq pillugu aalajangiisoqarnissaa aatsaat taama qanitsigaaq, aatsitassarsioqatigiiffiup pisortaa taama allappoq.
Aatsitassarsiornermut isiginnittaaseq nutaaq
Aatsitassarsioqatigiiffiup tusagassiuutinut nalunaarummi, Kalaallit Nunaanni aatsitassarsiorneq pillugu tamanut ammasumik oqallinnermi piffissami matumani ineriartortoqarnera oqaluttuaraa.
- Siunissami isertitassat, suliffissat aningaasaqarnikkullu ineriartornerullu suminngaanneernissaat kiisalu Kalaallit Nunaata aatsitassaatai, nunap ineriartorneranut siunissaq ungasinnerusoq eqqarsaatigalugu, qanoq sunniuteqarsinnaanerat soqutigineqaleraluttuinnarpoq, Greenland Minerals allappoq.
- Taamaattumik aatsitassarsiorfiit angisuut aningaasaqarneq pillugu oqallinnermi pingaaruteqarneruleraluttuinnarput, ilaasalu inatsisit killilersuisut maanna atuuttut aamma naalakkersuisut oqartussaasullu periaasii assigiinngitsut apeqquserpaat.
Naak aatsitassarsioqatigiiffik suliassanngortitsisinnaanerup tungaatigut isumaqatigineqaraluarlutik, tamaanga killittoqarnera uggorivaat.
- Kuannersuit ullumikkut aatsitassarsiorfiusussaagaluarpoq Kalaallit Nunaanni suliffissanik pilersitsisoq Europallu pisariaqartitaanik aatsitassanik qaqutigoortunik pilersuisoq. Tamatumali akerlianik suli eqqartuussivikkoorussivugut. Kinguartitsineq tamanna Kalaallit Nunaata aningaasaqarneranut Europallu pilersuinermik qulakkeerinninniarluni anguniagaanut akisuvoq, pisortaq Daniel Mamadou allappoq.
Aatsitassarsiulernissartik suli neriuutigigaat
Taamaattumik aatsitassarsioqatigiiffiup suliassanngortitaasuni tallimat isumaqatigineqannginnerat suliallu nangeqqinneqarsinnaanngornera naammagisimaarpaa.
Eqqartuussisuuneqarfiup eqqartuussinerup qaqugu pinissaa ukiap ingerlanerani ulllissavaa. Ingerlatseqatigiiffiup aappaagu ukiakkut eqqartuussisoqarnissaa neriuutigaa.
- Suliassanngortitaasunit suliamut tunngatillugu ukiuni arlalinni akerliliisoqartareersorlu suliap maanna suliarineqaqqissinnaalernissaa neriuutigaarput, eqqartuussiviummi nalunaarnera naapertorlugu 2027-mi ukiakkut eqqartuussisoqarsinnaalissaaq, pisortaaneq allappoq.
Greenland Mineralsip Kuannersuarni misissuinissamut akuersissummik sivitsuiniarnera ukioq manna siusinnerusukkut itigartinneqarpoq.
Taamaattorli uranimut inatsit, 2021-mi qinersineq eqqartuussivimmilu suliaq maassakkut ingerlagaluartoq Daniel Mamadouip aatsitassarsiorfiliornissamut akuersissummik pissarsinissartik suli neriuutigaa.
- Kuannersuit ineriartortinneqarnissaa atulernissaalu suli anguniagaraarput, taamaalilluni suliniut suliffinnik pilersitsinissamut, aningaasaqarnikkut ingerlataqalernissamut piffissarlu ungasinnerusoq eqqarsaatigalugu inuiaqatigiinnut iluaqutaasinnaaniassammat.
