Suliffeqarfik ataaseq imermik tuniniaassaaq
marsip 07-at 2005 05:38
Imermik tunisassiulersinnaanermut atatillugu suliffeqarfik sorleq suliakkinneqassanersoq Aatsitassanut Pisortaqarfiup upernaamut paasiniassamaaraa, pisortaq Søren Hald Møller oqarpoq.
Inatsisartut aningaasanik 18 mio. kr.-nik ukiut sisamat ingerlaneranni immikkoortitsisarsimapput. Aningaasat taakkua sermersuaq qanoq ilillugu iminngorlugu tunisassiarineqarsinnaaneranut paasiniaanermut atorneqartussaapput, qanorlu ilillugu USA-mut Europamulluunniit tuniniarneqarsinnaanersoq aamma misissorneqartussaalluni.
Imermik tunisassiulersinnaanissamut atatillugu inatsisartut ukioq mannaannaq 4,5 mio.kr-nik aningaasaliisimapput.
Pisortaqarfiup naatsorsuutigaa kina imermik tunisassiornissamik suliaqalissanersoq upernaaru paasinarsissasoq.
