Suliffeqarfiit sulisunut akisussaassuseqarnerat oqaluuseraat

Isumasioqatigiinnermut peqataasut ilaat Kristian Lennert pissarsiaqarluarnerarpoq.

- Inuiaqatigiit pitsaanerusumik patajaannerusumillu atugaqalernissaat anguniarlugu kivitseqatigiinnissaq pisariaqarpoq, taammattumik una isumasioqatigiinneq pissarsiffigeqaara. Ingeniørit siunnersuisarfiatut suliffeqarfimmi INUPLAN A/S pisortaaneq Kristian Lennert oqarpoq.

Kristian Lennertip isumasioqatigiinnerup kingorna suliffeqarfimmut uteruni sulisuminut tunniussassarpassuaqarluni aamma oqaatigaa.

Kristian Lennertip aamma oqaatigaa kivitseqatigiinnermi inuiaqatigiit peqqinnerusut patajaannerusullu pilersinneqarpata suliffeqarfittut ajunnginnerusumik siunertagissaartumillu ingerlatsilernissaq anguneqarsinnaasoq.

Isumasioqatigiinnermi peqataasut ilaat Niels Mathiassen, Kalaallit Nunaanni Brugsenimeersoq, isumasioqatigiinnermi pissarsiaqarnerarpoq.

- Isumaqarpunga taamatut isumasioqatigiinneq iluaqutissartalerujussuusoq, soorlu misilittakkatsigut paarlaasseqatigiissinnaanitsinnut kiisalu aamma suleqarfinni allani aamma Danmarkimeersuni periutsit atorneqartut paasisaqarfiginerisigut, pissarsiaqarnaqaaq.

Niels Mathiassenip neriuutigaa suliffeqarfiit pitsaanerusumik akissussaassuseqarnerusumillu ingerlatsilernissaat isumasioqatigiinnerup nassatariumaraa.

- Neriuutigaara akisussaassuseqarnerusumik ingerlatsilernissaq anguneqarumaartoq, uani eqqarsaatigaara atuisut takusinnaalissagaat pisiniarfik una suliffeqarfilluunniit akisussaassuseqartumik ingerlatsisuusoq, taamaattumillu atuisunit tatigineqarluarsinnaasoq, Niels Mathiassen oqarpoq.

Niels Mathiassen Kristian Lennertilu marluullutik isumaqarput taamatut isumasioqatiinneq siunissami ingerlanneqartuaannarumaartoq.