Suliffeqarfiit sanaartortut nuannaajallapput
Aviisimi Sermitsiami ullumi saqqummersumi tamanna allaaserineqarpoq.
Siorna novembarimiilli inuit 500-t 750-illu missaanniittut suliffimminnik annaasaqarsimasut, Sulisitsisut Peqatigiiffianni aatsitassanut sanaartornermullu suliaqarfimmut ataatsimiititaliami siulittaasoq Martin Ben Shalmi naliliivoq.
- Suliffeqarfinni nipit ernummateqartut politikerinit tusarneqarnerat nuannaajallannarpoq. Aningaasaliissutit siuartinneqarnerisa sunniuteqarluarnissaat qularutissaanngilaq, taanna oqarpoq, ilanngullugulu tikkuarlugu sanaartornissanut aningaasaliissutigineqartut 40 procentiisa missaat sulisartunut tuttartut.
Tamatuma kinguneranik inuit 174-it missaat sulilersinnaassasut, Martin Ben Shalmip oqaatigaa.
- Naak inunnut 750-inut suliffeeruttunut kisitsit taanna ungasikkaluartoq, taama suliniuteqarneq ajoriinnagassaanngitsoq taassuma oqaatigaa.
Illoqarfiit sorliit sanaartugassanik siusinaartumik aallartitsiviussanersut maannamuugallartoq suli paasinarsinngilaq, millionit koruunit amerlanngikkaluartut illoqarfinnut ataasiakkaanut angisuumik sunniuteqarsinnaasut, Martin Ben Shalmip Sermitsiamut erseqqissaatigaa.
SIK-p siulittaasuata Jess G. Berthelsenip Naalakkersuisut suliniutaat aamma naammagisimaarpaa.
- Aalajangiinerit taamaattut pisariaqartinneqarput. Suliassat aallartinneqartannginnerat pissutigalugu Sanaartugassanut Iluarsagassanullu Aningaasaateqarfimmi aningaasarpassuarnik asuli kusassaataaginnartunik uninngasoqarpoq, Jess G. Berthelsen oqarpoq.