Suliffeqarfiit nunatsinni pigineqartut salliutittariaqarnerarpaat
Kalaallinit ingerlanneqartup sulisitsisut kattuffiata NUSUKA-p oqallissaarutigaa, pisortat suliffeqarfiutaat sanaartortitsileraangamik suliffeqarfiit nunatsinni pigineqartut salliutittassagaat.
NUSUKA-miillu siunnersuutigineqarpoq, nunatsinni suliffeqarfiit angerlarsimaffillit 21 procenti tikillugu akisunerugaluarlutik suliamik tigusisinnaasariaqartut.
Taamatullu isumassarsineq Nunavumiit aallaaveqartoq oqaatigineqarpoq, Per Jensenip Nunavummi NNI-mi pisortaasoq Denis Simard apersorpaa, taannalu ima nassuiaavoq.
- NNI 2000-mi atuutilersinneqarpoq, kingornalu nalilersorneqarlunilu iluarsaanneqartarpoq. Kingullermik 2004-mi nalilersorneqarpoq, tullianilu 2008-mi nalilersoqqinneqassaaq.
Pilersaarusiaq ajornakusoortorujussuuvoq, suliamiillu suliamut nalilersuisoqartariaqartarluni.
Naalakkersuisut suliassiissutaannut atatillugu suliffeqarfinnut nunaqavissunut salliutitsisarneq sumiiffinni ataasiakkaani aningaasaqarneq siuarsarniarneqarpoq, sumiiffinnili amerlasuuni suliffeqarfeqanngimmalluunniit suliffissaqartitsiniarneq amerlanerpaanillu ilinniartitsineq anguniarneqarpoq.
Inuussutissarsiornermik suliaqartunut akimmiffiit qularineqaraluarput, siunertarineqartulli aamma paasineqarlutik. Ullumikkullu Nunavumi aningaasaliinissaq iluaqutissarpassualittut isigineqarpoq, NNI Policy-p ilaanik piniaraanni.
Pilersaarusiaq atuutilermalli nunaqavissut suliffiutillit amerlipput, aallartinniarnerannilu oqilisaanneqarput, taama oqarpoq NNI-mi ataqatigiissaarinermi pisortaq Denis Simard.
Nunavummi taamatut aaqqissuussaaneq atuutilermalli ukiut ingerlanerini nalilersorneqartuarlunilu arlaleriarlugu allanngortinneqartarpoq, pinerillu tamaasa Nunavumi Inuit peqatigiiffii suleqatigineqartarput.
