Suliffeqarfiit namminersortunngorsarneqalerput

Namminersornerullutik Oqartussat suliffeqarfiutaat namminersortunngorsarneqalerput – suliffeqarfillu ataaseq maanna namminersortunut tuniniarneqalerpoq.

Greenland Resourcesimi, assigiinngitsorpassuarnik kiffartuussaqartartumi, siulersuisut ippassaq ataatsimeersuarput. Thulemi mittarfimmik kiffartuussineq, Greenland Contractorsimik taaguteqartinneqartoq, immikkoortunut pingaarnernut ilaavoq – aatsitassanik misissuinermi atortussanik angallassineq aamma pingaarnernut ilaatinneqarpoq. Qilleraluni atortut, aatsitassanik piiaanermi atortut angallanneqarneri, sulisussanik ilinniartitsisarneq, aatsitassanillu piiaanermi kiffartuussinerit assigiinngitsorpassuit, aatsitassanik misissuinermi atortussanik angallassinermi kiffartuussissutigineqartarput. Pisortallu suliffeqarfiit taamatut kiffartuussissallutik immaqa tulluutinngillat.

Naalakkersuisunut ilaasortaq Jørgen Wæver Johansen – Namminersornerullutik Oqartussat sinnerlugit - ataatsimeersuarnermi oqalugiarami oqarpoq, aatsitassanik misissuinerit, ukiuni kingullerni amerliartortut, pisortat suliffeqarfiutaannit malinnaaffigiuminaassimasut, taamaalillunilu ineriartortitsinissaraluaq akimmisaartinneqartoq. Aatsitassanik misissuinermi atortussanik angallassinerup tunineqarnissaa, Greenland Resourcesip siulersuisuinut Namminersornerullutik Oqartussat saaffigissinnissutiginiaraat, Jørgen Wæver Johansen aamma oqarpoq.