Suliffeqarfiit minnerumaat Nusukap periarfissaqalersorai

Siumup siuttunngorneratigut suliffeqarfiit minnerit annerumaallu sanaartornermik suliallit periarfissaqalersut Nusuka isumaqarpoq. Sanaartornerup sineriammut siaruartiternissaa Siumup qineqqusaarutigimmaga Nusuka taamatut isumaqarpoq.

Sineriami pissutsit Nusukap ilisimalluarpai, suliffeqarfiimmi suliakkerneqarnerisigut ilinniartoqarneq qulakkeerneqarsinnaavoq suliakkerneqanngikkaannilu matuinnartariaqarluni. Suliassat assigiinngitsut suliarinnittussarsiuussutigineqartalerpata sumiiffini sanaartornermik suliallit nukittoriartussasut Nusuka isumqarpoq.

- Aatsitassarsiornermut atatillugu Siumut Naalakkersuisuutillugu pitsaanerusumik naammassinnittoqarnissaa uagut ilimagaarput. Akitsuutit ingerlatsiviillu akileraarutaat pillugit pitsaasumik oqimaaqatigiissaarisoqarnissaa ilimagalutigu, IBA naapertorlugu ingerlatsinerit ilusilersornissaat qilanaaraarput, Nusukap pisortaa Gerth B. Lynge oqarpoq.

Ingerlatsiviit suliaqarneranni sanaartornerup ingerlatsinerullu nalaani kalaallit suliffeqarfiisa mikisut annikitsullu Nunatsinni tamani periarfissarissaarnerulernissaat anguniarlugu Nusuka tamaviaassaaq.

-Isumaqatigiinniarnerni pisuussutit uumassusillit ilanngunneqarnissaat neriuutigaarput, aalisartut piniartut savaatillillu tunisiffissarissaarnissaat anguniarlutigu. Tamannalu sanaartornerup ingerlatsinerullu nalaani atuutissaaq. Siunissaq eqqarsaatigalugu suliffeqarfiit minnerit annerumaallu amerlanerusunik periarfissaqalernissaat upperaarput, Nunatsinni aningaasaqarnermut iluaqutaassasoq, suliffissanullu kiisalu ilinniartut amerlanerit ilinniartuutigineqartalernissaat ilimagaarput, Gerth B. Lynge nassuiaavoq.