Suliffeqarfiit marluk peqquserlussimasutut pasineqarput

Suliffeqarfiit marluusut - Pernagreen aamma BJ Entreprise - suliarinnittussarsiuussinernut atatillugu, kia suliassaq tigussaneraa - aamma qanoq akeqartinneqassasoq - qulakkeerniarlugu neqeroorutigisaminnik ataqatigiissaarisarsimasutut pasineqarput. Sermitsiaq nittartakkamini taama allappoq.

Unammilleqatigiinnermut inatsit naapertorlugu tamanna inerteqqutaavoq, suliarinnittussaarsiuussinermimi anguniarneqartarpoq, neqerooruteqarnermut atatillugu unammisoqartassasoq.

Namminersorlutik Oqartussat suliarinnittussarsiuussineri ilaatigut suliamut ilaapput.

Nuummi Sisimiunilu suliffeqarfiit najugaat politiit misissueqqissaartartuinit marlunngormat misissuiffigineqarmata, pappiaqqat uppernarsaatit arsaarinnissutigineqarlutillu paasissutissat qarasaasianiittut iserfigineqartut, Sermitsiap allaaseraa.

- Politiit misissueqqissaartartuinit misissuiffigineqarnerput eqqortuuvoq. Unammilleqatigiinnermullu inatsimmi aalajangersakkat malillugit maanna misissuisoqarpoq. Taakku saniatigut allanik oqaaseqarusunngilanga, Permagreenip pisortaa Preben Kold Larsen oqarpoq.

BJ Entreprisep aviisip paasissutissiinera uppernarsarumanagulu uppernartuunnginnerarumanngilaa.

- Oqaaseqarusunngilagut, BJ Entreprisemut piginneqataasoq Jeppe Mortensen Sermitsiamut ilisimatitsivoq.

Suliarinnittussarsiuussinerni salloqittaaniarnerit soqutigisaqatigiinnit ingalassimaniarneqartut Kalaallit Nunaanni Sulisitsisut Peqatigiiffiani pisortap Henrik Lethip erseqqissarpaa, suliamillu suliarinninneq sukkasuumik ingerlanneqassasoq neriuutigalugu.

- Piffissami sivisunerusumi taama pasillerneqarsimaneq, suliffeqarfimmut aseruutaasinnaavoq, Henrik Leth oqarpoq.