”Piginnaasatit pisariaqartippavut”. Taama qulequtserlugu suliffissanik nittarsaassinerit marluk Københavnimi Århusimilu sapaatip-akunnerata naanerani matumani ingerlanneqassapput. Nittarsaassinerit siunertaraat kalaallit amerlanerit ilinniarnerminnik naammassinnereeraagamik Nunatsinnut angerlarusussuseqalersinnissaat.
Danmarkimi ilinniagaqartut 500-t missaanniittut aaqqissuussisunit nittarsaassinermut qaaqquneqarsimapput.
Danmarkimi ilinniagaqartut kattuffianit DKIK-mit suliffissanik nittarsaassineq nunatsinni suliffeqarfiit 23-t peqatigalugit aaqqissuunneqarpoq.
Nunatsinni suliffissat pillugit paasissutissiinerup saniatigut Nunatsinni sungiusaatigalugu suliffissat, ilinniarnerup nalaani ikiortitut suliffissat, aasaanerani suliffissat misissuinernilu assigiinngitsuni ikiortitut suliffissat ilinniagaqartunut tusarliunneqassapput.
Københavnimi Århusimilu suliffissanik nittarsaassineq ingerlanneqassaaq akunnittarfinni SAS Radisson-ini. Inuussutissarsiutit siuarsarneqarnissaannut pilersaarutit aamma peqataasunut saqqummiunneqassapput kiisalu Nick Nielsenip Himalayami qaqqasiornini oqaluttuariartorlugu takkunniarluni nalunaaruteqarsimavoq.