Suliatigut peqatigiiffiit suliniutit angisuut pillugit inatsit suli qularnartoqartippaat

Aviisip Nunatsinni Danmarkimilu  suliatigut peqatigiiffiit arlallit oqaloqatigisimavai, taakkulu ilarpassuisa inatsit toqqissisimanartinnagu oqaatigaat, naak Siumup allannguutitassatut siunnersuuteqarnikkut akuersissutigisassanngorlugu saqqummiussassaani allanngortiteriffigineqarsimagaluartoq.

Inatsimmulli tapiliussassat suliatigut peqatigiiffiisa ernumassuteqarnerannik annikillisitsinngillat.

- Inatsisip ilusiligaanera ernumanartoqartipparput. Piiaavinni sulisartut allamiut nunani allani akissaatit pillugit isumaqatigiissutinik atueratarsinnaanerinut periarfissat annertuallaarput, Kaalina Skifte, perorsaasut kattuffianni NPK-mi siulittaasoq Politikenimut oqarpoq.

Taanna ilinniartitsisut kattuffianni siulittaasumit Sivso Dorphimit taperserneqarpoq:

- Suli qularnartoqartipparput. Siornatigumut naleqqiullugu aaqqiissoqaraluarpoq, taakkuli naammaqqajanngillat, Politikenimut oqarpoq.

Inatsisip nutaamik ilusiligaanera SIK-p ilalerpaa, naak ilaliinera hurraartuutissaanngikkaluartoq. SIK-p siulittaasuata Jess G. Berthelsenip ilaatigut oqatigisimavaa kalaallit siulisartut sulisartullu allamiut »akissaatitigut assigiinngitsupilussuarnik atugassaqartinneqarnissaat« ernumagalugu.

Taamatut ernumassuteqarnera Danmarkimit aamma isumaqatigineqarpoq, suliatigummi kattuffiup 3F-ip siulittaasuata Per Christensenip inatsisip oqaasiliornerata annersaa Kalaallit Nunaanni suliffeqarnermut malittarisassanut pittuttorsimanngitsunik innersuussiffiunera maluginiarsimavaa..

- Naliliinerput malillugu oqaasiliornera akissaatitigut akikinaarerujussuarluni sulisoqarnissamut periarfissiijuarsinnarpoq. Kalaallit Nunaanni akissaatitigut atorfinitsitsinermilu atugassarititaasunut innersuussisoqarani oqaatsit »akissaatitigut atugassarititaasut akuersaarneqarsinnaasut, kinaassusersiunngitsumillu suliatigullu tunngavilersorluakkat« suli atorneqarput, tamannalu assigiinngitsunik nassuisoqarnissaanut ammaassissaaq, Politikenimut taama oqarpoq.

Suliniutit angisuut pillugit inatsit, ippassaq kinguartitsisoqartariaqarnerata kingorna, Inatsisartuni ullumi siulliullugu eqqartorneqartussaavoq.