Suliassat kivitseqatigiinnikkut naammassineqarsinnaanissaat ujartorneqarpoq

Qaasuitsup Kommunissaata isorartuallaarnerarneqarneranut atatillugu oqallittoqarnera Avannaani innuttaasunut toqqissisimannanngitsorujussuussasoq, Qaasuitsup Kommunissaani Ikaarsaariarnermut ataatsimiititaliami ilaasortap, Timooq Mølgaardip, Atassummeersup, takorloorsinnaavaa, suliassallu kivitseqatigiinnikkut naammassineqarsinnaanissaat ujartorlugu:
oktobarip 03-at 2008 06:21

- Kivitseqatigiinnissarput pingaarutilerujussuuvoq, oqaqattaarata immaqa sapissavarput, Timooq Mølgaard oqarpoq.

Aasiaat aamma Ilulissat aningaasatigut nammattussaannartut isiginiarneqarnerat taassuma ilumuunnginnerarpaa, kommunit minnerit, soorlu Qeqertarsuup Kommunia, aningaasaqarnikkut ajunngitsumik aamma inissisimanerat oqaatigalugu.

- Kommunit kattussuunneqarnissaanut aalajangiinnginnermi Atassummiit killissaa tikillugu ilungersuutigigaluarput Diskobugtiluunniit kommunitut ataatsitut isigineqassasoq, tusaaniarneqarsimanatali, Timooq Mølgaard oqarpoq, nangipporlu:

- Kingusinaarlutilli takusinnaalersimavaat kommunissaq angivallaartoq. Kingumut isigaluta aalajangersinnaaneq pissusissamisoorsorinngilarput. Tunngavilersuutivut taamani tusaaniarneqarsimasuuppata ajornartorsiutit massakkutut ittut pinngitsoorsimasinnaagunaraluarpavut, Timooq Mølgaard Radioaviisimut oqarpoq.

Atassut sinnerlugu Qeqertarsuup Kommunalbestyrelsiani ilaasortaq, Qaasuitsullu Kommunissaani Ikaarsaariarnermut ataatsimiititaliami ilaasortaq, Timooq Mølgaard, taama oqarpoq.

Qaasuitsup Kommuniani illoqarfiit arfineq-pingasuussapput nunaqarfiillu 32-ussallutik, tassa inoqarfiit 40-t kommunerujussuanngussapput.