Suliassat angisoorsuit pillugit ilisimasat nikerarput

Radioaviisi ullumi Air Greenlandip kantiinaani ullup qeqqartut oqaloqatigai. Tassani isumasiorneqarput saffiooq, aningaasaqarnermi suleqataasoq, aningaasarsiornermi ataqatigiissaarisoq aamma peqqumaasivimmi sulisoq.

Inuit taakku sisamat suliassat angisoorsuit pillugi isumasiorneqarput inatsisissatut siunenrsuut uani sapaatip akunnerani suliarineqartussaammat, paasinarsivorlu ilisimasaat nikerartorujussuusut.

Aningaasaqarnermi suleqataasoq Ruth Kristensen oqaluttuarpoq ilisimasani tusagassiutit aqqutigalugit pissarsiarisarlugit. Oqallinnerli politikkerit akornanni pisoq iluarinngeqaa isumaqarluni taanna tassaasoq qaffasissumik assortuunneq innuttaasunut peqataaffigiuminaatsoq.

Peqqumaasivimmi sulisoq Carlo Lukassen misigisimavoq ilisimatinneqarluarsimalluni naak ilisimasani tusagassiutit aqqutigalugit pissarsiani annertuginngikkaluarlugit. Taassuma oqallinneq ileqqorinngilaa.

Taannali isumaqarpoq suliassat angisoorsuit pillugit ilisimasani ajunngitsut aammalu politikkerit ilisimasaqarluarnerat naatsorsuutigalugu. Neriuppoq nunatsinni pitsaanerusussaq politikkerit toqqarumaaraat.

Saffioorli Vittus Jeremiassen toqqissisimanngilaq. Taassuma Transparency Greenlandip ullaaq radioaviisimi oqariartuutaa isumatigaa, tassani oqariartuutigineqarmat ilisimatinneqarluarnissaq innuttaasut pisinnaatitaaffigigaat tamanna nunatsinnut sunniuteqartorujussuusussaammat.

- Transparency Greenland isumaqatigaara oqarmat inatsit akuersissutigineqarmat peqqissimeriarfissaqanngitsoq, Vittus Jeremiassen oqarpoq.

Aningaasarsiornermi ataqatigiissaarisoq Bodil Marie Damgaard aamma toqqissisimanngilaq. Taamatullu eqqarsarnerminut tunngaviginerarpaa inatsisip kingunerisassaa ilisimannginnamiuk. Aamma ilisimannginnerarpaa inuit pisinnaatitaaffii malinneqassanersut Kinamiut nunatsinnut tikeralerpata.

Politikkerit innuttaasunut ilisimatitsiniartarnerat Ruth Kristensenip naammaginngilaa. Taassuma ernummatigaa nakorsat kigutillu nakorsaat naammannersut isumaqarami ullumikkut innuttaasunut sullissiniarnerat angummanniapiloorfioreersoq. Taassuma ilisimaqqissaannginnerarpaa politikkerit suniarnersut paasissutissat pissarsiarinissaat ajornakusoorsorigamiuk. Sumiluunniit aallartissalluni nalunerarpaa. Aamma oqallinneq inuppalaannginnerarpaa isumaqarami oqaatsit politikerit atugaat inuinnarnut inornartuusut.

Aamma saffiooq Vittus Jeremiassen suliassat angisoorsuit pillugit oqallinnermi malinnaalluarsorigaluarluni taamaattoq isumaqarpoq politikkerit paasissutissiinerat pitsaanerusimasariaqaraluartoq assersuutigalugu innuttaasunik ataatsimiisitsinerni.

- Innuttaasunut pissanganarninngorlugu aaqqissuunneqarsimasariaqaraluarpoq innuttaasummi ataatsimiisinneqarneranni peqataasut ikippallaaqaat. Aallarniisut aamma oqaluppallaarujussuaqaat ataatsimiinnerup naalernerani aatsaat innuttaasut sivikitsumik isummersortinneqartarmata. Isumaqarpunga tamanna qeratavallaartoq paasissutissallu pissarsiat annikippallaartut, Vittus Jeremiassen oqarpoq.