UNESCO - Suliassat aatsaat aallartilerput
Kommune Kujallermi sumiiffiit tallimaasut Naalagaaffiit Peqatigiit ataanni ilinniartitaanermut, ilisimatusarnermut kulturimullu suleqatigiiffiimmi UNESCO-mi Nunarsuarmi nunat eriagisassat allattorsimaffiannut, ilanngunneqarneri nuannaarutigineqarput. Takornariartitsinermummi inuussutissarsiornermullu iluaqutaassangatinneqarmat.
AAMMA ATUARUK UNESCO verdensarven giver os ansvar
Ilulissammi eqqaaniittoq Sermermiut eriagisassatut ukiut 13-it matuma siorna allattorsimaffimmiilermat taama pisoqarpoq. Nunarsuarmioqatitsinnimmi maluginiarneqalernerulersimasoq takornarialeriffimmi World of Greenlandimi atorfilik Jakob Schytz oqarpoq.
- Allattorsimaffimmeeriaratta nunarsuarmioqatitta Ilulissat massakkut nalunngilaat, taanna oqarpoq.
Ilisimaneqalernerulernerlu takornariartitsinermut iluaqutaasimasoq aamma oqaatigaa.
Eriagisassat allattorsimaffianiilerneq takornarianit soqutiginninnermik ammaassigaluartoq taakkua namminneq takkunnissaat utaqqiinnarneqarsinnaanngitsoq aamma tikkuarpaa. Takornarianimmi amerlatsisaaneq aatsaat aallartisarneqalersoq, Jakob Schytz oqarpoq.
AAMMA ATUARUK Qeqqata Kommunia UNESCO-p allattorsimaffianut aamma ilarusuppoq
- Massakkut suliassat aallartissapput, takornariammi takkuttut ulapputaalertussanngormata. Soorlu angallannerit imaluunniit takornariartitsinerit allallu suliassanngortussanngormata, Jakob Schytz oqarpoq.
Taanna Qaasuitsup Kommuniani inuussutissarsiornermut takornarialerinermullu pisortap, Hans Peter Lennertip isumaqatigaa.
- Taamaattumik atorfeqartitsivugut, kangiata allaffeqarfianik taallugu, taakkulu nalinginnaasumik suliarisarpaat killeqarfiit nakkutiginissaat, taakkulu Unescop allattorsimaffianiittut nakkutiginissaat, Hans Peter Lennert oqarpoq.
AAMMA ATUARUK Nunarsuarmi kingornussatut eriagisassatut UNESCO-mut innersuussinissaq Kujataani oqallisigineqartoq
Nunami eriagisamik nakkutiginninnerup saniatigut nittarsaassineq paasissutissiinerlu aamma suliassanut ilaapput.
- Suliaq annertoorujussuuvoq Unescop ataani inissisimalerneq, Hans Peter Lennert oqarpoq. UNESCO-lli eriagisassatut allattorsimaffianiilerneq Qaasuitsup Kommunianut aamma iluaqutaasimanerarpaa.
AAMMA ATUARUK UNESCO-mit allatsissimaneq ukiumut 63,5 mio. kr.-inik naleqarpoq
