Suliassaq naalagaaffiup unnerluussisuanut ingerlateqqinneqarpoq

Politimesterip tullia Morten Nielsen Radioaviisimut taama ilisimatitsivoq.

Oktobari naalersorli Siumup siulittaasuata Aleqa Hammondip, qinigaasinnaanermik naliliisartuni ilisimalikkaminik nipangiussisussaatitaanerminik unioqqutitsisimaneragaanera, politiinit misissuiffigineqarpoq.

Inatsisartut qinigaasinnaanermut naliliisartuini, Inatsisartuni ilaasortat politiinit pineqaatissinneqarsimanerannik misissuisussani, ilisimalikkaminik nipangiussisussaatitaanerminik Aleqa Hammond unioqqutitsisimaneragaavoq.

Atuagagdliutini allaaserineqartutut Aleqa Hammondip ataatsimiititaliami ilisimalikkani, ataatsimiititaliami ilaasortaanngitsunut arlalinnut ingerlateqqissimavai - tamannalu nipangiussisussaatitaanermut naapertuutinngilaq.

- Suliassani taamaattuni, qinikkat pineqartillugit, suliassap ingerlateqqinneqarnissaa siunertaralugu naalagaaffiup unerluussisuanut ingerlateqqinneqartarpoq, Morten Nielsen oqarpoq.

Taassuma unnerluutigineqartut oqaaseqarfigerusunngilai, soorlu aamma naalagaaffiup unnerluussisuata suliassamik qaqugu aallartitsinissaa oqaatigisinnaannginneraraa.

Naalagaaffiup unnerluussisua Danmarkip naalagaaffiani unnerluussisartut qullersaraat. Taassuma ilaatigut eqqartuussiviit qullersaanni pineqaatissiissutit isumagisarai.