Suliassanngortitsineq illersuisut ernumanartoqartinngilaat

Østre Landsretimut suliassanngortitsineq Puisi A/S-imi pisup ingerlaneranik paasinarsaaginnassasoq suliami illersuisut ilaat isumaqarpoq.
marsip 02-at 2011 09:45

Puisimik sivikitsumik aliikkutarineqarluartumilli pilersitsiniarnerup iluatsinngitsoornera pilersiniakkap pisortaanit siulersunilu ilaasortat pissuteqarani politikkikkulli aalajangiinerlunnernik pissuteqartoq Kalaallit Nunaani Eqqartuussivimmit naqissuserneqarpoq.

Suliarli sivisuumik ingerlanneqartoq pillugu naatsukullammik eqqartuussuteqarneq Namminersorlutik oqartussat naammaginngilaat. Siulersuisut akisussaaffiannut atatillugu inatsisitigut najoqqutassat Naminersorlutik Oqartussanit qulaajaqquneqarmata, eqqartuussinermuinnaq atatillugu manna tikillugu 11 miliuuni koruunit missaannik Namminersorlutik Oqartussanut akeqarsimasoq Københavnimi nanginneqartussanngorpoq.

Eqqartuussissuserisutut illersuisut ilaata, Nicholas Symesip, apersorneqarusunngitsup suliareqqitassanngortitsineq tupigusuutigalugulu nikalluallaatigaa.

Minnerunngitsumi suliap taama sivisutigisumik ingerlanneqareernera eqqarsaatigalugu. Taanna Radioaviisimut mailimi allappoq inatsisitigut pissutsit piviusunit qaangerneqareersimasut. Danmarkimi eqqartuussivinni qaffasinnerusuni ingerlatsiviit siulersuisuisa ileqqorissaarnissaannut aalajangersakkat maanna naqissuserneqareernikuummata. Østre Landsretimut ingerlatitseqqiineq suliami qanoq pisoqarsimaneranik nalunaarusiorneq taamaallaat anguneqassasoq Nicholas Symesip oqaatigaa.

Taanna aamma isumaqarpoq eqqartuunneqartut pisuutinneqannginnerannut Namminersorlutik Oqartussat nammineq pisooqataasut. Namminersorlutimmi Oqartussat qaqutigoortumik pissuseqarlutik namminneq nassuiaatitserusunngillat ilisimannittunillu sassartitserusunnatik. Taamaammat pisimasut eqqartuunneqartunit taamaallaat nassuiaaffigineqarput.

- Taamaammat kingusiinnaq qanoq pisoqarsimaneranik itinerusumik paasisaqarusulluni ingerlatitseqqinneq kamaammernarpoq, Nicholas Symes allappoq, nangillunilu;

- Suleqatikkalu inatsisitigut naliliinerput naapertorlugu ajugaassangatippugut. taamaammallu eqqissilluta suleqqissamarluta.

Tunisassiorfiliaq Puisi ukiut aqqanillit matuma siorna qatangiinngarpoq, Namminersornerullutillu Oqartussat Kalaallit Nunaanni eqqartuussivimmut taamatuma suliakkiissutigineraniit ukiut arfineq-pingajussaata affaa qaangiuppoq. Eqqartuussummilu februaarip pingajuanneersumi Puisimi pisortaasimasoq siulersuisunilu ilaasortaasimasut tamarmik Puisip nakkaattoorneranut akisussaasuunnginnerarneqarput. Puisimik pilersitsiniarnerugaluaq Landskarsimut 22 miliuuninik akeqartoq maanna Namminersorlutik Oqartussat Østre Landsretimut suliareqqitassanngortippaat.