Suliartunngitsuukulasut pisortap appisaluuppai

Allaaserisami atuarneqarsinnaavoq Kalaallit Nunaata avammut nioqqutigisartagaanit 90 procentit tassaasut aalisakkat qaleruallillu, taamaakkaluartorli aalisarneq akilersinnaasumik ingerlasinnaanngilaq.

Pisortat umiatsiarsinermut aalisakkerivinnullu annertuumik toqqaannartumik tapiissuteqartarput, aammalu innaallagissap erngullu akiinut toqqaannanngikkaluartumik tapiissuteqartartut.

Ajornartorsiutinik ilisimasaqarluartut ilagaat Niels Thomsen. Taanna Halibut Greenlandimi pisortaavoq.

Informationip tusagassiortuanit pulaarneqarami oqaluttuarpoq sapaatit akunnerisa naaneri tulleriit sulisorpassuit suliartunngitsoorsimasut. Pingaartumillu sapaatit akunnerisa naanerini akissarsiffiusuni tamanna ajornartorsiutaasartoq. Sulisut ilaat aalaakkaasumik sulisarput, affaali sulinissartik eqiaginngikkaangamikku suliartortarlutik.

- Sulisut 30-40-t missaat soraarsissavagut. Ullaaq ataatsimiikkatta taama oqarpunga. Nalunngisarigaluaraanniluunniit soraarsitaassapput. Taamatut pissuseqarneq atorsinnaanngilaq, Informationimut oqarpoq.

Ilulissani ullumikkorpiaq suliffissaaleqisutut nalunaarsorneqarsimasut 172-iunerisa ajornartorsiummik millisitsinngilaq. Taamaakkaluartormi aalisakkeriviit ukiut tamaasa ukiup ilaani aalisarnerup annertunerpaaffiata nalaani sulisunik ilinniarsimanngitsunik sulisussaaleqisarput. Tamannalu ilaatigut aalisakkat tippattoorutigalugit igiinnartariaqartarnerinik kinguneqarsinnaasarpoq. Tamannalu koruuninik 100.000-ilikkuutaanik annaasaqaatigineqartartoq, Niels Thomsenip oqaatigaa.

- Inuit piffissaq eqqorlugu suliartorsinnaannginneri suliffimmillu paarsisinnaannginneri inuiaqatigiinnut ajornartorsiutaavoq. Inuussutissarsiorfiit nutaat, piiaaviit, kalaallinik sulisulersorneqarsinnaanissaat takorluugaavoq inornarluinnartoq. Ilinniartitsisoqarnissaa ullumikkornillu allaanerusumik eqqarsartaaseqalertoqarnissaa pisariaqarpoq, Niels Thomsen Informationimut oqarpoq.

Kinamiunik aalisakkerivinni sulisussanik,  kalaallillu akissarsiaasa assinginik akissarsiaqartillugit atugassarititaasut assinginik atugassaqartillugit tikisitsiniarluni tusagassiutitigut aamma sioorasaarutigisimavaa. Sulisinnaasunik sulisoqarusuppoq, Halibut Greenlandip pisortaa ersarissumik taama oqariartuuteqarpoq.